Monica Kock ta comparti e historia di Kapel Emanuel

ORANJESTAD (AAN): Pa Monica Kock, yiu di difunto arkitecto Virgilio Kock, e ponemento oficial di e seyo di monumento protehi na Kapel Emanuel

no ta solamente un reconocimento na un edificio historico, sino tambe na e vision inovado di su tata y na e legado cu e a laga pa Aruba.

Durante e ceremonia na San Nicolas, Monica Kock a relata con su tata a yega na e proyecto cu apenas 25 aña di edad. Virgilio Kock a nace na Santa Cruz na 1939 den un famia humilde y tabata parti di e prome grupo di Arubianonan cu a bay Hulanda pa studia.

Na 1962 Virgilio a gradua den H.A. Bouwkunde y a bolbe Aruba, unda el a bira e prome Arubiano cu e titulo aki pa traha na DOW.

Poco tempo despues, entre 1963 y 1964, Pastoor Bas di Iglesia Catolico a pidi Virgilio Kock pa diseña un kapel nobo na San Nicolas. Tabatin solamente un condicion: e diseño mester tabata moderno.

Segun Monica Kock, e inspiracion di su tata tabata basa riba e significado di e nomber Emanuel, “Dios cu nos”, y riba e naturalesa unico di Aruba, particularmente e brisa constante di noord-oost.

“E forma principal di e edificio ta triangular y ta incorpora e letra V, cu ta simbolisa un angel cu su halanan habri,” Monica a explica.

E simbolismo aki ta ripiti den diferente elemento di e kapel, incluyendo e portanan, e toren y e structura mes. E punta di e edificio ta orienta pa e direccion unda solo ta sali, representando luz y renobacion, mientras cu e altar ta situa den e punto di e fe pa brinda inspiracion.

Monica Kock a enfatisa cu su tata tambe a incorpora elementonan practico basa riba e clima Arubiano. E edificio ta orienta di tal forma cu e brisa natural por circula libremente door di e bentananan, mientras cu columnanan vertical, conoce como brise soleil, ta proteha contra e solo pa mantene e interior fresco.

“Te awe e kapel no tin necesidad di fan,” Monica a comenta.

Den interior, simplicidad y serenidad ta domina e diseño. Tur muraya, balki y plafon ta dirigi bista pa un solo punto. E sistema di iluminacion, cu tabata hopi moderno pa e tempo ey, tabata scondi den e plafon y produci un efecto di un shelo yen di strea.

E altar ta traha cu piedra natural di Hooiberg y a wordo realiza pa artesano italiano Angelo Seia. Tambe e decoracion tras di e altar ta incorpora piedra blanco y gris di Aruba, reforsando e conexion cu nos isla. 

Segun Monica Kock, e diseño inovado di Virgilio Kock a haya reconocemento internacional. Pastoor Bas a manda e proyecto pa un competencia di arkitectura na Francia y na 1979 e diseño a gana un premio di 10.000 franc, un cantidad cu den e tempo ekivalente na cerca di 3.000 florin. E premio a wordo destina pa e parokia.

Virgilio Kock a sigui su carera como arkitecto y a contribui na diferente edificio importante na Aruba, entre nan e Markthal na Wilhelminastraat, e telefonia na San Nicolas y e proyecto di Renaissance Beach Hotel y Seaport Marketplace.

Pa Monica Kock, e declaracion di Kapel Emanuel como monumento protehi ta confirma cu e vision di su tata ta sigui biba.

“Su diseño a combina speransa, fe y naturalesa. Awe e ta wordo reconoci oficialmente como parti di nos patrimonio y lo sigui inspira generacionnan futuro.”