ORANJESTAD (AAN): Cu e meta pa fortalece comunicacion y transparencia entre gobierno y comunidad,
Minister Rene “Baba” Herde a lansa un programa interactivo riba su pagina oficial di Facebook, unda e ta contesta preguntanan haci pa ciudadanonan tocante asuntonan relaciona cu su ministerio.
Pueblo por manda nan pregunta directamente via e pagina social di Minister. Durante e transmisionnan regular di e programa, Minister Herde ta brinda aclaracion y informacion tocante diferente tema y proyecto cu ta cay bou su ministerio di Vivienda, Infrastructura, Servicio Interno y Telecomunicacion.
E iniciativa ta ofrece un canal directo di comunicacion entre ciudadano y gobierno, pa asina permiti pa cualkier preocupacion, duda y pregunta relevante wordo contesta di un manera habri y accesibel.
Actualmente e programa ta wordo transmiti dos pa tres biaha pa siman riba Facebook. Alavez, den un futuro cercano, e programa lo wordo emiti via Telearuba, cu lo duna espacio pa un publico mas amplio por sigui e sesionnan informativo aki. E intencion ta pa un biaha pa luna haci un programa en bibo, unda por interactua cu e publico via e pagina di Facebook.
E programa ta wordo publica tur dialuna y diahuebs mainta riba e pagina oficial di Facebook di Minister Rene “Baba” Herde. Nos ta invita comunidad pa participa activamente door di comparti nan preguntanan y sigui e transmisionnan, pa asina keda na altura di e informacion mas reciente tocante e trabao y desaroyo den e ministerio.
