Miss Aruba Universe a sali pa Florida pa evento di Miss Universe

ORANJESTAD (AAN): Dialuna mainta DIARIO tabata na Aeropuerto Internacional Reina Beatrix, ora cu Miss Aruba Universe, esta Helen Hernandez a sali rumbo pa Hollywood, Florida, pa actividadnan preparando pa Miss Universe 2021.

Cu un outfit hopi trendy cu sombre riba cabez, por a mira cu Helen tabata den bon humor y completamente cla pa bay haci un bon papel pa e certamen aki cu lo ta den Seminole Hard Rock Hotel & Casino.

Helen a indica cu el a viaha algun tempo pasa pa su preparacion na Colombia, y despues di tur esaki, e ta completamente cla pa haci un bon papel na e certamen aki.

Den fin di siman cu a pasa, Helen Hernandez a estrena e ‘trahe nacional’ cu e lo bisti durante e evento na e certamen. E trahe nacional yama “The Goddess of the Sea”. E inspiracion pa esaki ta e olanan di lama cu ta dal contra e barancanan di e isla. E parti patras di e trahe ta representa e olanan ta dal contra baranca.

E evento preliminar mes lo ta Diabierna 14 di Mei 2021, y e certamen final di Miss Universe lo ta Diadomingo 16 di Mei 2021.

Pa prome biaha desde 2015, e conocido Steve Harvey lo no ta e presentador pa e certamen e biaha aki. E anfitrionnan pa e aña aki lo ta Mario Lopez (di Access Hollywood) y tambe Olivia Culpo (ex-Miss Universe).