Ministro di Enseñansa hopi satisfecho cu e momento historico di Concierto di Leerorkest

Gobierno ta inverti 200 mil Florin den e bunita proyecto aki.

ORANJESTAD (AAN): Den fin di siman, Minister Endy Croes hunto Prome Minister Evelyn Wever-Croes a atende e concierto di Leerorkest cu a tuma luga na den IMAX Theatre na Gloria Entertainment Complex.

   Sigur un momento historico, unda cu den forma di un Orkesta Nacional alrededor di 550 di 5 diferente scol basico a duna un bunita presentacion musical. E cinco scolnan cu a participa ta Prinses Amalia Basisschool, Colegio Laura Wernet Paskel, St. Paulus School, Graf von Zinzendorf Basisschool y Aruba Adventist Academy.

  E alumnonan di klas 3, 4, 5 y 6 ta ricibi un bes pa siman les door di nos propio musiconan, unda cu nan ta siña toca diferente instrumento entre otro, fiyo, cello, trompet, trombone, dwarsfluit y clarinet.

   E muchanan a traha hopi duro durante henter e aña escolar pa por presenta dilanti un publico grandi den forma di un concierto.

   Durante e ceremonia di apertura, Minister Endy Croes, Prome Minister Evelyn Wever-Croes y Sr. Johnny Scharbaay a hiba palabra. E mandatario di Enseñansa y Deporte a indica cu Gabinete Wever-Croes II a inverti 200 mil Florin pa duna continuidad na e bunita proyecto aki.

   Por ultimo, Minister Endy Croes ta gradici coordinado di Leerorkest Aruba Señora Juliette van Romondt y ekipo cu ta eherciendo un bunita trabao. Tambe a gradici e musiconan pa siña e muchanan cu hopi amor y contribui den e desaroyo musical di Pais Aruba. Pa finalisa, e mandatario di Enseñansa ta felicita e alumnonan cu nan magnifico presentacion.