Bunita anochi di graduacion di Colegio Conrado Coronel

ORANJESTAD (AAN): Diasabra anochi, e muchanan di Klas 6A y tambe Klas 6B di scol basico Colegio Conrado Coronel a despedi di otro,

y tambe di nan docentenan awor cu nan tur ta bayendo pa Scol Secundario.

   Special pa esaki, a tene un ‘Anochi di Graduacion’ caminda tur e 54 alumnonan a ricibi nan Certificado di a finalisa nan scol basico.  Esaki a ser haci den Las Palmas Ballroom di Holiday Inn Resort Aruba.

   E tema cu a escoge tabata ‘Sparkling Gatsby Graduation’, y por a nota cu tanto e docentenan y alumnonan a bin cu e tema aki bisti e anochi, y tabata hopi unico.  E anochi a cuminza cu tur alumno para dilanti ta canta Himno di Aruba, sigui pa e Cancion di Scol.  Despues tabatin dos show di baile, y posteriormente a bay di biaha pa entrega di Certificado.

   Cada alumno cu nan toga bisti, cu petchi di graduacion a subi escenario pa ricibi nan Certificado.  Despues a sigui un cena delicioso y exquisito prepara pa e team culinario di Holiday Inn, cu a haci bon trabao cu servicio na tur hende.

   DIARIO ta desea tur e alumnonan, hopi exito awor cu nan ta bayendo Scol Secundario.