Ministro di Enseñansa a bishita Montgomery College na Maryland

ORANJESTAD (AAN): Durante e biahe di trabao na Merca, Minister di Enseñansa y Deporte Endy Croes hunto cu Minister Plenipotenciario na Washington D.C.

Señora Joselin Croes y directora general di Colegio EPI Señora Ankie Danker a haci un bishita oficial na Montgomery College na Maryland.

   E motibo di e bishita aki ta pa yega na un acuerdo pa traha den colaboracion cu Colegio EPI, Universidad di Aruba y Instituto Pedagogico Arubano (IPA). Durante e bishita, a reuni cu dr. Michael Mills y henter e ekipo di Montgomery College, pa evalua riba ki liña por inicia.

   Un di e opcionnan ta cu Colegio EPI a cuminsa cu un structura nobo pa e estudio di 3 aña di ICT y ta mira con por conecta esey pa sigui cu un Associate degree cu e ayudo di Montgomery College. Dr. Michael Mills a expresa cu nan ta entusiasma pa traha den colaboracion cu Aruba y cu e colaboracion aki no ta beneficia Aruba solamente, pero tambe Montgomery College.

   Desde algun aña atras caba, Minister Plenipotenciario Joselin Croes a bin ta trahando riba e colaboracion aki pa Aruba. Tambe durante e bishita oficial, Minister Endy Croes hunto cu Minister Plenipotenciario Joselin Croes y Señora Ankie Danker a haya un recorido di e campus.

   Pa finalisa, Minister Endy Croes ta expresa cu e ta hopi contento pa traha den colaboracion cu e college y ta sigur cu pa inicio di aña 2024 ta bay logra algo bunita cu Montgomery College.