Sentencia di Hues ta acusa AVP directamente di a viola ley di eleccion - *E hecho cu ta kima formularionan pa voto ta prueba di secrecia hancra den ley -*Ley riba cual AVP a trapa ta evita hustamente cu eleccion ta bira negoshi cu voto
ORANJESTAD(AAN)—E acusacionnan di AVP contra e Conseho Supremo Electoral a cuminsa for di momento cu a yama eleccion y AVP a acusa e instancia independiente di kier a uza e sistema di vota pa medio di machine, di kier comete fraude electoral.
Despues di eleccion AVP a pretende cu Conseho Supremo Electoral no a tene su mes na ley y a cuminsa un caso den cual a pidi Huez pa bolbe conta votonan pasobra AVP por a entrega Huez portret di formularionan cu ciudadanonan a uza pa vota.
Cu otro palabra, AVP tabata dispone di formulario den cual e secrecia di eleccion ta hancra y cu hamas por cay den man di ningun hende unabez, den presencia di tur partido, voto wordo conta, despues seya pa wordo destrui den candela.
DIARIO ta ripiti cu e ta contento cu Huez a dicidi di scucha AVP y mira e prueba cu el a trece dilanti, cu a resulta den e hecho cu AVP tabata tin den su man portretnan di e voto secreto di ciudadanonan, loke ta un acto castigabel.
Huez a mustra AVP cu a portretnan ta castigabel. Esaki ta algo cu tur ciudadano mes mester por comprende y ta increibel cu un partido politico ta presenta portret na Huez di voto cu e ciudadano a depone.
Pakico portret di un voto ta castigabel?
Si eleccion ta secreto, ta pa evita cu politiconan tin un arma den nan man pa dicidi kico e votador mester vota. Ora un partido por dicidi kico un ciudadano mester vota, e pais ta den estado di dictadura pero tambe den un situacion directo di corupcion.
Ley ta mustra cu benta di voto ta prohibi pasobra esaki ta base di corupcion, loke ta bini directamente dilanti den e sentencia di Huez contra AVP, cu Huez ta acusa directamente di a comete un acto castigabel.
Kico ta nifica cu den sala di Corte, Huez ta bisa cu loke e partido politico a haci ta un caso castigabel?
E ta nifica cu aki e partido politico, en todo caso e personanan cu a actua na nomber di e partido politico, a haci nan mes culpabel di un acto criminal.
Ora kibra secreto di voto, manera Huez a trece dilanti, caminda ta habri pa e votador ofrece su voto na un partido politico pa placa. Cu otro palabra, eleccion ta bira un negoshi loke ta haci cu ta e partido cu tin mas placa pa parti, ta gana eleccion y por trapa riba Pueblo y leynan manera e kier.
Saca portret di e formulario di voto, ta nifica cu un evidencia ta wordo duna pa cual partido un hende a vota.
Den e caso aki ta portret di voto a wordo entrega na Huez.
AVP kier trece dilanti cu e portretnan aki a wordo tuma dor di personanan cu Ley ta paga pa sinta na un Stembureau, caminda nan mester garantisa cu e proceso legal ta tuma luga segun ley ta ordena.
Si nan a haya cu ta necesario pa a manda un portret pa e Conseho Supremo Electoral dicidi cu e voto ta corecto of no, copia di e foto cu mester tabata den man di Conseho Supremo Electoral y no den man di ningun representante di un partido y e imagen mester a wordo destrui imediatamente y no cay den man di ningun partido politico.
Caminda a habri aki pues pa un caso sumamente serio.
No ta cualkier instancia a bisa cu partido AVP a comete un acto contra ley, Aki ta Huez a dicidi cu e portretnan cu a wordo entrega ta prueba cu AVP a actua contra ley.
Ta na Ministerio Publico awor pa cuminsa cu un investigacion pa un caso penal contra AVP y tur cu a yuda AVP pa informacion secreto di eleccion cay den man di AVP y drenta publicidad.
Esaki ta nifica cu un cantidad di persona ta envolvi den e caso aki, cu atrobe ta duna prueba con AVP ta manipula cu votadornan. Den e caso di registro di votador, ya AVP mes a mustra cu nan kier e informacion di votador pa bay hiba votador vota si resulta cu e votador no presenta na urna electoral.
Eleccion ta duna prueba di accion contra ley di parti di AVP cu awe autoridad, Ministerio Publico, mester investiga. E proceso di eleccion no por bira un negoshi, un benta y compra di voto di parti ni di AVP of di cualkier otro partido.
E cantidad di casonan di corupcion cu ta wordo entrega contra AVP, no ta laga espacio pa mas na Aruba y sigur no den e proceso electoral.
