*2 persona a fayece relaciona cu COVID-19; 1 residente y 1 no-residente
ORANJESTAD (AAN): Segun resumen di DVG, riba diahuebs 69 persona a recupera y un total di 137 caso nobo di COVID-19 a keda registra cual 5 ta turista y 132 ta residente. E cifranan aki ta representa un 'Positivity rate' bou di nos residentenan di 28%.
Cantidad di casonan activo di COVID-19 pa awe ta 1053 y cantidad di fayecidonan relaciona cu COVID-19 a aumenta na 115 cu fayecimento di 1 residente y 1 no-residente. Ambos tabata interna y lamentablemente no tabata vacuna. Condolencia na famianan.
Datonan ta ilustra subida continuo di casonan nobo cu un average semanal di 111 caso pa dia y un average di 'positivity rate' semanal di 32% pa dia cu ta sigui subi.
Hospital tin actualmente 46 persona interna di cual 7 ta den ICU, 35 riba piso general, 3 riba piso di maternidad (hende muher na estado) y 1 riba pediatria (mucha). Datonan di hospital ta ilustra cu di e 46 personanan interna debi na COVID, 16 persona (36%) ta vacuna sea cu 1 of 2 vacuna y 28 persona (64%) no tin ningun vacuna y 2 DVG no ta dispone di su informacion na e momento aki.
