Benny lo a haya su retiro na un empresa priva pa bobedad como gerente - *Benny no por controla interes di Aruba si el cay den trampa di su grupo - *Kico Benny y AVP a haci ora a ripara kico nan grupo ta haci cu tereno?
ORANJESTAD(AAN)—Uno di e discusionnan serio cu a cuminsa na Aruba ta den seno di e grupo directamente relaciona cu e caso di Avestruz despues cu lo a sali den publicidad, cu segun abogado di Benny Sevinger, e politico a wordo malusa dor di hende di su propio grupo.
Esaki lo a conduci na un pelea den e circulo cu lo ta hopi yega na AVP, segun informantenan cu ta spera cu e actitud di culpa otro pa scapa Benny, lo por haci cu mas hende den AVP ta wordo cuestiona pa e hecho cu nan no a mira ni tende nada di terenonan, cu nan grupo mes lo a uza pa abusa di propiedad di Pueblo y bira mas rico.
Defensor di Benny Sevinger a bisa publicamente, cu su cliente no ta culpabel den e caso Avestruz, pero cu asuntonan cu lo no ta bon, a tuma lugar.
Mientras Benny a drenta Parlamento despues cu el a haya libertad bou condicion, e pregunta a nace den publico con Benny por representa Aruba den Parlamento si e no por a cuida ni su mes persona contra hende cu e no mester confia, segun a wordo publica.
E tarea di Miembro di Parlamento ta hustamente pa evita cu ningun hende ta abusa di Aruba.
Si Benny Sevinger tabata incapaz pa mira kico ta pasa cu terenonan di Aruba cu el a firma pa pasa pa cierto hendenan, e pregunta grandi pa tur hende ta keda, con Benny ta cuida interes di Aruba.
Ademas mester bini un splicacion si Benny y AVP mes no tabata mira con den nan propio grupo e terenonan cu Benny a duna na su grupo, tabata wordo uza.
E conclusion cu e declaracionnan di e abogado di Benny Sevinger a laga atras ta, cu Benny no tin capacidad pa vigila interes di Aruba debi na bobedad cu a keda demostra den e hecho cu el a firma pa hendenan cu e no mester a confia, haya tereno.
Finalmente e pregunta ta keda, kico Benny a haci ora el a ripara kico ta pasa, si otro di su propio grupo a haci algo.
