ORANJESTAD (AAN): Ministerio di Innovacion a tene un reunion importante hunto cu Cybersecurity Center of Excellence (CCOE)
y experto di siguridad digital, sr. Paul Eelens pa dialoga riba e desaroyonan cibernetico y e maneranan cu nos por subi e nivel di siguridad cibernetico specialmente den cuadro di desaroyo di e trayecto di e-Government.
Siguridad cibernetico no ta un luho mas awendia, sino un necesidad. E proteccion di dato di nos ciudadanonan ta esencial y p’esey, Gobierno lo traha pa delinia protocolnan di siguridad entre departamento, aumenta conscientisacion di tur funcionario publico, y sigui e mihor practica internacional den area di siguridad cibernetico. Gobierno mester por garantisa cu e servicionan publico online ta confiabel y accesibel y alavez e transformacion den e-Government tambe ta depende riba sistemanan digital sigur.
Ministerio di Innovacion ta enfatisa cu innovacion y siguridad mester bay man den man: mientras nos ta introduci mas servicio digital, nos mester proteha integridad y confidencialidad di e datonan aki. E combersacion cu CCOE ta ilustra con necesario y crucial ta pa yuda nos pais subi e nivel di proteccion, prepara personal, y sigui construi un arkitectura confiabel den cuadro di digitalisacion, brindando confianza pa su uzo na comunidad.
Gobierno di Aruba ta comprometi pa fortalece su infrastructura digital, pa cu cada ciudadano por haya beneficio di un Aruba moderno, sigur, innovativo y protehi.
