ORANJESTAD (AAN): Dialuna mainta a tuma lugar un conferencia di prensa relaciona cu e asina yama AGRI Fund Project,
cu ta den cooperacion cu ministerio di Asuntonan Economico, Comunicacion y Desaroyo Sostenibel.
E intencion ta pa e AGRI Fund duna acceso na financiamento y guia pa empresarionan den e sector di Agricultura, pa asina nan por haci inversionnan necesario y por cuminza of expande nan propio negoshi.
Branch manager di Qredits Nathaly Harms a splica cu esaki lo duna un empuhe significante na e sector di Agricultura na Aruba, como un pilar economico.
No solamente e fondonan lo bira accesible, pero tambe lo percura pa e structura ta uno cu lo wordo implementa cu ta apropia pa e sector di Agricultura na Aruba. Esaki ta acompaña cu sosten di Qredits Aruba.
“Na comienzo di 2023 e prome Agri Business Academy a wordo introduci, unda cu tur esnan cu ta aspira pa bira un agricultor comercial, por a haya e guia necesario pa por prepara nan plan di negoshi y plan financiero”.
Awo cu lanzamento di e ‘Agri Loan’, tur esnan cu ta aspira pa bira of ya caba ta un agricultor comercial, por aplica pa financiamento pa haci e inversionnan necesario pa nan negoshi, segun Harms.
El a splica cu ta trata aki di un prestamo comercial, cu un maximo di 200 mil florin, cu un interes reduci na 2%.
“Di parti di Qredits Aruba mi kier a gradici minister Geoffrey Wever y minister Ursell Arends pa e bon cooperacion di casi 2 aña caba, pa haci e proyecto aki un realidad”, segun Harms.
