Parlamentario Shailiny Tromp-Lee:
ORANJESTAD (AAN) – Den conferencia di prensa di fraccion di MEP, Dialuna mainta, Parlamentario Shailiny Tromp-Lee a menciona cu Dialuna, den Sala di Parlamento, tabata tin Minister di Husticia y Asunto Social Rocco Tjon, cu a papia tocante criminalidad bao di hoben.
Esaki ta un reunion cu a wordo pidi pa fraccion di AVP, debi cu nan ta di opinion cu e situacion bao nos hobennan ta uno preocupante, y cu ta rekeri di atencion debido.
Tromp-Lee a señala cu contrario na con fraccion di AVP ta presenta esaki, fraccion di MEP ta di opinion cu no ta di awo e situacion ta rekeri di atencion, pero desde cu Gabinete Wever-Croes a tuma e mando, esaki tabata un di e puntonan di prioridad.
E parlamentario a bisa cu mediante “Social Crisis Plan” e atencion a keda duna debidamente, na e hobennan, y tin otro stakeholders cu ta traha dirigi riba e problematica di e hoben y el a haya ta bon pa Minister Tjon elabora tocante diferente proyecto cu a, y ta tumando lugar, kico ta e efectonan cu esakinan tin te awo, y na mes momento e ta haya ta bon tambe pa cifranan keda presenta, pa por keda monitor e tereno di criminalidad bao di hoben, y tambe kico ta e problemanan cu nos hobennan tin y kico ta conduci cu nan ta yega na un situacion cu tabata preferible pa wordo evita.
Tromp-Lee a bisa cu fraccion di MEP lo a enfatiza riba e aspectonan cu nan lo kier a haya tende di Minister Tjon un biaha mas, locual e parlamentario a acentua, pasobra e dignatario a bin ta presentando diferente proyecto, of nan resultado, of proyectonan nobo, riba tereno di prevencion como tambe riba tereno di empoderacion di nos hobennan.
Tromp-Lee a subraya cu contrario na e impresion cu fraccion di AVP kier crea na prome lugar, cu gobierno no ta mira e situacion como algo urgente, y di dos cu e no ta hayando su atencion, ta basa riba mentira.
El a remarca cu AVP kier crea e impresion di caos y e aspecto di desesperacion, cu e parlamentario no ta haya corecto, pasobra sigur bao di e capa di Social Crisis Plan, e ta bin ta hayando su atencion.
“Lamentablemente, nos tur mester ta conciente cu e resultado di cambio di maneho, programanan dirigi, bo lo no bay mira mes lihe cu nos ta desea. Pero esey no ta kita afo cu e ta hayando su atencion debido”, Parlamentario Shailiny Tromp-Lee a comenta.
Finalmente, e parlamentario a invita pueblo di Aruba henter pa participa den e actividadnan cu ta bay tin pa celebra Aruba su Dia di Himno y Bandera.
Dia 17 di Maart tin e acto cultural riba Plaza y e ta encurasha un y tur pa asisti na e actividadnan aki y pa mayornan inculca den cada un di nan yiu, e importancia cu e Dia Nacional aki tin, y cu ta forma un parti crucial di nos identidad, e parlamentario a bisa. Di awo caba, el a desea un Feliz Dia di Himno y Bandera na henter comunidad.
