Mainta trempan Prome Ministro a bishita Scol Basico De Schakel

ORANJESTAD (AAN): Alumnonan di Scol Basico De Schakel, dialuna mainta tempran cu hopi entusiasmo tabata warda yegada di Prome Minister Evelyn Wever-Croes.

   E siman aki, en conexion cu Dia di Himno y Bandera, Prome Minister lo ta bishitando varios scol rond Aruba. Na De Schakel, Prome Minister a worde ricibi pa Directora señora Inge La Haye y pa docente y alumnonan feliz cu e bishita di Prome Minister. Na su yegada, Premier a ricibi un bunita boket di flor.

   Klasnan 5 y 6, a haya bishita di Prome Minister den klas na unda tabata tin un interaccion hopi special. Prome Minister a expresa cu el a ricibi hopi pregunta critico di parti di e muchanan. Nan tabata tin interes pa sa kico e trabao di Prome Minister ta encera y di Gobierno. ‘Tabata bunita pa mira y experencia con bon prepara e muchanan ta pa e celebracion cu ta na caminda y tambe pa bida’.

   Directora di scol basico De Schakel, señora La Haye, tambe a expresa cu tabata un bunita bishita y particularmete e alumnonan a haci hopi pregunta di e historia di Aruba y di Himno y Bandera. ‘E bishita di Prome Minister tabata hopi inspirativo, y nos ta hopi agradeci cu su bishta.’

   Prome Minister a keda contento cu e interes di nos muchanan pa conoce mas di e historia di nos simbolonan nacional. Prome Minister a termina gradiciendo De Schakel pa e oportunidad y a desea tur mucha y tur docente un Feliz Dia di Himno y Bandera.