Aruba ta parti di mundo liber den e confrontacion na Ukraine --- *Un guera di interes petrolero ta rementa den porta di Aruba --- *Asdrubal Chavez na mando di cuatro empresa Chevron/PDVSA
ORANJESTAD (AAN) — E decision di Gobierno Joe Biden pa na un momento culminante, manda un delegacion Venezuela, a percura pa un confusion grandi den region di Caribe na momento cu un guera mundial ta culmina.
Na nivel internacional e posibilidad di uzo di arma biologico cu ta destrui hende y arma nuclear, ta tene hende den suspenso.
Informantenan clave di DIARIO ta preocupa cu un situacion caminda intentonan a wordo haci pa regla e situacion na Venezuela, centro di operacion di Rusia, Bellarus y cantidad di pais peligroso den e situacion actual.
Publicacionnan di agencianan di noticia di renombre internacional, a confirma e informacionnan di DIARIO tocante e papel cu e compania petrolero Chevron ta hunga den desaroyonan di ultimo siman.
“Un guera di interes petrolero a rementa den porta di Aruba,” ta e informacion cu a wordo confirma ayera na DIARIO na momento cu DIARIO a ricibi tambe publicacionnan internacional cu ta papia di e forma cu Aruba directamente ta wordo menciona den noticia internacional.
Reuters ta uno di e agencianan internacional di noticia di renombre mundial. Den su publicacion el a trece dilanti e problemanan cu e compania Chevron di Merca ta enfrenta na Venezuela.
DIARIO den e ultimo dianan aki, a base di informacionnan clave di fuentenan den exterior, a mustra Aruba cu den desaroyonan regional, ta e interes directo di Chevron a wordo pone dilanti interes di e region di Caribe, cu ta den turbulencia grandi.
Den publicacionnan di Reuters ta bini dilanti loke ya DIARIO a presenta den ultimo dianan aki, cu ta e permiso cu Chevron mester haya di Gobierno Joe Biden pa e continua cu su negoshinan petrolero na Venezuela.
Chevron cu tin cuatro compania hunto cu PDVSA na Venezuela na e momento aki mester atende directamente cu Asdrubal Chavez, cu ta dirigi PDVSA,
Asdrubal Chavez ta primo di Hugo Chavez y tabata e dirigente di Citgo, cu mester a bandona Merca na careda.
Actualmente Chevron ta bou peso di Asdrubal Chavez y kier haya e permiso di Gobierno di Merca pa e amplia su posicion na Venezuela y asina haya mas forsa den e empresanan cu e ta comparti cu Venezuela.
Aki por mira con den e guera den cual mundo comunista ta confronta mundo liber, e interes di cierto companianan manera Chevron y PDVSA si ta uni pa causa turbulencia.
Nomber di Aruba ta wordo menciona den e publicacion, den cual ta wordo bisa cu Chevron ta asina optimista cu ya el a cuminsa prepara su peticionnan pa via Aruba e haya permiso pa sy trahadornan bay traha na Venezuela.
E no a menciona si ta trahadornan di Merca, caminda e tin su companianan tambe como compania Mericano.
Mientrastanto Gobierno Mericano ayera a anuncia cu nan no mester di petroleo di Venezuela y cu nan ta negocia cu Colombia.
DIARIO ta siguiendo tur desaroyo den region di Aruba, cu tambe mester tene na consideracion cu e ta parti di mundo y cu e tambe mester ta alerta pa cualkier desaroyo cu e situacion mundial por tin a base di e situacion di guera internacional, cu ta pone Aruba na banda di e Aliadonan contra Rusia.
