Minister-President Mike Eman ta expresa su profundo condolencia despues di tragedia na Vogelwaarde

ORANJESTAD (AAN):   Minister-President Mike Eman a expresa, na nomber di Gobierno y Pueblo di Aruba,

su profundo sentimento di convivencia y condolencia pa e comunidadnan afecta na Hulst y Terneuzen despues di e tragico accidente di trafico cu a tuma luga na Vogelwaarde, den cual varios hoben y un begeleider a perde nan bida den forma doloroso.

Den e cartanan dirigi na e burgemeesters di Hulst, Jense van Haarst y Burgemeester Weerwind di Terneuzen, Minister-President Eman a expresa cu profundo pesame como  reaccion riba e tragedia y a transmiti su sincero condolencia y convivencia na e famianan afecta, e comunidad escolar, e compañeronan di scol, e docentenan, e coleganan y tur e personal di emergencia cu a presta asistencia durante y despues di e accidente.

“Un tragedia manera esaki ta laga herida profundo, pa e personanan directamente involucra y tambe den henter comunidad,” segun Minister-President Eman.

Minister-President a enfatisa cu, apesar di distancia geografico entre Aruba y Hulanda, Pueblo di Aruba ta sinti un fuerte sentido di solidaridad y conexion cu tur esnan cu ta sufri pa motibo di e tragedia aki.

Eman a pone enfasis riba e hecho cu dolor, compasion y solidaridad no conoce frontera y cu den e momentonan asina nos ta recorda di nos humanidad comparti, nos responsabilidad pa cuida pa otro y cu forsa ta nace for di unidad.

Na nomber di Pueblo y Gobierno di Aruba, Minister-President Eman a desea e famianan di e victimanan, e comunidad escolar y tur esnan afecta hopi forsa, consuelo y union den e periodo dificil cu ta dilanti di nan.

Cu e mensahe aki, Aruba ta uni su mes den pensamento y oracion cu e famianan y cu tur esnan cu a wordo toca pa e tragedia doloroso aki.