Segun Maribelle Tromp, Presidente di HAVA:
ORANJESTAD (AAN)-- Drs. Maribelle Tromp, presidente di HAVA, den entrevista cu Matutino DIARIO a comenta, cu no mester lubida cu docternan ademas di brinda cuido, ta duna prevencion tambe.
“Mi ta kere cu e tema di prevencion ta uno cu mester ta mas fuerte. Hopi di e malesanan ta bira mas jong, y Steps ta indica den varios factor di malesanan cronico y esaki por wordo evita door di un miho manera di biba unda por reduci e factornan di riesgo.
Nos tin un cuido cu awo a wordo lanza, cu ta e cuido multidisciplinario, pa diabeticonan na Aruba, y docternan di cas ta forma parti di e cuido multidisciplinario aki. Nos tin ciruhanonan cu ta take care pa pashentnan cu malesa cronico, manera diabetes, etc. Dus, nos ta purba di brinda e cuido ey, e maximo cu por. Pero cu prevencion mester ta mas fuerte na Aruba, esey ta un realidad” drs. Tromp a señala. Drs. Tromp a señala cu docter ta haya e pashent ora e malesa tey caba. E ta kere cu mester tuma e pasonan concerni cu tin di haber cu prevencion. “Ta un poco mas proactivo kizas, mi no sa. Pero nos como huisarts, e prome liña di cuido, tin tur e cuidonan necesario pa pashentnan cu malesanan cronico”, Maribelle Tromp a remarca.
