Minister Oduber y Minister Tjon a haya presentacion di e proyecto di digitalisacion di 'horecavergunning'

ORANJESTAD (AAN):  Diahuebs mainta minister di Turismo & Salud Publico, Dangui Oduber conhuntamente cu minister di Husticia y Asuntonan Social sr. Rocco Tjon a haya un presentacion den cuadro cu e proyecto di digitalisacion di horecavergunning.

            E proyecto aki a cuminsa October aña pasa conforme maneho pa elimina red tapes, trece transparencia y agilisa e proceso unda ta duna permiso na hotel y F&B.

            Pa hopi aña caba e proceso pa permiso den sector di horeca tabata tin su dificultadnan y tabata un proceso largo pa cana. Esaki hopi biaha ta haci e caminda pa negoshi mas fastioso. Debi na esaki, aña pasa a cuminsa cu e proyecto caminda lo a digitalisa y optimalisa henter e proceso di permiso di horecavergunning.

             Durante e trayecto aki, tur e institucionnan concerni manera KPA, brandweer, DWH y DWJZ lo haña workshops pa siña con pa implementa e innovacion aki. E intencion ta pa bai live den luna di April 2023, pues na e momento cu bay live, tur proceso di haci peticion te dunamento di permiso lo bay completamente digital.

            Conhuntamente cu e departamentonan, a revisa e workflow y awor den luna di maart lo cuminsa cu workshops pa asina bay live April.

            Minister Oduber ta orguyoso di mira e innovacionnan aki y ta spera cu e cambio ta uno positivo pa e sector di turismo y salud publico. Sigur esaki ta un stap pa haci e procesonan di permiso den e sector di horeca mas eficiente.

            Oduber ta gradici tur e departamentonan cu ta participando den e proyecto aki pa asina por implementa e digitalisacion y ofrece un mihor producto pa Aruba.