Minister Herdé ta felicita e graduadonan di EPI Unit Ciencia y Tecnologia

*Ta dificil pa atrae suficiente studiante den direccion tecnico

ORANJESTAD (AAN): Minister Rene Herdé, a forma parti diahuebs anochi na e ceremonia oficial di graduacion di EPI Unit Ciencia y Tecnologia, unda un grupo nobo di profesional a celebra e culminacion exitoso di nan estudio.

Durante su discurso, Minister Herdé a felicita e graduadonan cu nan perseverancia, dedicacion, compromiso y a enfatisa cu Aruba mester di hoben profesional prepara pa contribui activamente na desaroyo di nos isla. “Boso ta e ingenieronan y tecniconan cu lo forma y lidera e futuro di Aruba. E conocemento cu boso a adkiri ta fundamental pa sigui desaroya nos infrastructura, nos economia y nos comunidad,” Minister a enfatisa.

Minister Herdé a pone enfoke riba un reto importante cu e sector di enseñansa tecnico ta confronta, cu ta e dificultad pa atrae suficiente studiante den direccion tecnico. El a stimula e institucion pa sigui busca manera innovativo pa haci e estudionan den tecnica mas atractivo pa e hobennan, pasobra e demanda pa profesionalnan den e sector aki ta sigui crece.

Tambe a destaca e importancia di mantene un colaboracion estrecho entre e institucion educativo y e mercado laboral. Segun Minister, e oportunidad di stage ta esencial pa duna studiantenan experiencia practico, fortalece nan preparacion profesional y facilita nan transicion di scol pa mercado di trabou.

Den su mensahe, Minister Herdé a enfatisa cu e enseñansa moderno no ta limita solamente na transferi conocemento tecnico. “Nos mester forma hobennan cu ta pensa criticamente, ta creativo y cu por analisa y soluciona problema. E habilidadnan aki ta fundamental pa e profesional di futuro,” Herdé a indica.

Minister a haci un yamada na EPI pa sigui posiciona su Unit Ciencia y Tecnologia como un referente den enseñansa tecnico na Aruba, basa riba innovacion, calidad y un oferta educativo cu ta responde na e necesidadnan di nos pais y di mercado laboral.

Como parti di e ceremonia, a reconoce e mihor graduadonan. Tambe a otorga certificado na e studiantenan cu a completa practicanan internacional na Irlanda, Belgica y Corsou. E experiencia internacional ta amplia nan conocemento y ta prepara nan pa enfrenta e reto di un mercado laboral cada biaha mas competitivo.

Na final di e ceremonia, Minister Herdé a lesa e formula oficial di graduacion, marcando un momento simbolico den cual e graduadonan oficialmente a bira profesionalnan prepara pa cuminsa un capitulo nobo den nan bida.

Gobierno di Aruba ta felicita tur graduado, nan famia, docente, mentor y personal di EPI pa nan esfuerso y compromiso pa educacion di calidad. Gobierno ta sigui mantene e punto di bista cu inversion den enseñansa tecnico, innovacion y desaroyo di talento local ta esencial pa construi un Aruba mas fuerte, competitivo y prepara pa futuro.