Grupo ‘Briya Hunto’ di Elmar ta activo atrobe y a yuda riba Dia Nacional di Cuida Aruba

ORANJESTAD (AAN): E grupo di boluntario di NV Elmar, esta “Briya Hunto” a participa na Dia Nacional di Cuida Aruba na Brazil.

   Manera ta conoci, Dia Nacional di Cuida Aruba, un iniciativa di Gobierno di Aruba y CEDE Aruba pa reuni organizacionnan y boluntarionan den un esfuerso colectivo pa mantene Aruba limpi.

   E actividad a marca tambe e relansamento di Elmar su grupo di boluntario, awor cu e nomber “Briya Hunto”, cu ta promove participacion colectivo den iniciativanan cu ta contribui na bienestar di nos comunidad.

   Un grupo di 20 boluntario di NV Elmar a recoge sushi riba e ruta di Parada Folklorico Cultural, incluyendo Caya Bernadina Growell y e areanan di Brazil y Mabon. E esfuerzo a contribui na preparacion di bario di Brazil pa Dia di Brazil y Parada Folklorico Cultural.

   Cu e relanzamento di “Briya Hunto”, NV Elmar ta sigui fortalece su compromiso social y promove trabao den ekipo den beneficio di nos comunidad.  Hunto Nos ta Briya Mas.