Minister Endy Croes ta felicita comunidad venezolano cu inauguracion di e proyecto ‘La Casa del Venezolano’

ORANJESTAD (AAN): Diaranson atardi den un esfera ameno Minister Endy Croes hunto cu colega Minister Glenbert Croes a inaugura oficialmente sede di e proyecto ‘La Casa del Venezolano’, despues di varios luna brindando servicio.

            ‘La Casa del Venezolano’ ta un organisacion cu ta enfoca den educacion como instrumento pa inclusion y tranformacion social. Ta brinda asistencia huridico y social na imigrante y ta ofrece cursonan gratis pa siña e idioma Papiamento, Hulandes y Ingles. Ademas ta ofrece tayernan di entre otro derecho humano, proteccion internacional y gruponan di sosten.

            Den presencia di sr. Luis Zaraga, coordinadora di e proyecto sra. Grislynn Hernandez, representrantenan di Pan American Development Foundation (PADF), invitadonan, colaboradonan y bolunatrionan e mandatarionan a corta e cinta  pa asina ‘La Casa del Venezolano’ por a keda oficialmente inaugura.

            ‘Pami ta un gran honor di por ta awe cu bosonan’, mandatario di Enseñansa a expresa.

Minister Endy Croes a sigui bisa cu VENEARUBA Solidaria un fundacion cu pa varios aña nos ta wak ta traha cu hopi boluntad, aprecio, dedicacion y cariño na bienestar di e grupo mas vulnerabel den nos comunidad promoviendo proyectonan di innovacion, social, integracion pa esnan cu mas tin mester di dje como tambe pe muchanan.

            Den nomber di Gobierno di Aruba ta felicita Fundacion VENEARUBA Solidaria cu e bunita proyecto alabes nan hopi exito y conta cu nos sosten cu e bunita proyecto aki. Den temponan dificil semper nos mester keda cu fe, firmesa y speransa pa nos sigui recupera y percura pa progreso pa cada un den e comunidad aki.

            Miniter Endy Croes a termina cu un dicho cu nos gran libertador Betico Croes a yega di bisa: Arubiano, no ta solamente esnan cu a nace na Aruba pero tur esnan cu ta haci Aruba nan hogar. Masha pabien y hopi exito!

.