ORANJESTAD (AAN): E compania Petrobras a cuminza cu trabao di bora enbusca di petroleo, riba e lama tiki panort di Riohacha na e parti mas noordoost di Colombia.
Petrobras ta socio di e trabao na bloke Tayrona, unda e compania nacional Ecopetrol di Colombia tin 55,56% di participacion. Meta di e cobamentonan aki ta pa busca di por haya petroleo na e costa net panort di La Guajira.
Trabaonan a cuminza na e pos yama ‘Uchuva-1’ cu ta na un profundidad di 837 meter bao superficie di lama, y ta como 32 kilometer leu for di costa cerca di Riohacha.
Nan a escoge pa bora na e area aki, pa check posible area nobo cu por haya petroleo. E operacion di cobamento lo wordo haci cu un plataforma tipo semi-submergible.
Tabata na 2021 cu e Agencia Colombiano pa Exploracion di Petroleo a anuncia cu lo bay test cobamento na tres poz pa exploracion. E poznan aki ta Gorgon-2, Uchuva-1 y tambe Cumbia-1 cu e meta principal pa check si lo por haya poz di gas.
Colombia ta contento cu e trabaonan di exploracion a cuminza bek, pasobra esakinan casi a stop completamente na 2020 ora cu crisis a impacta sector di petroleo, debi na caida internacional di prijs di petroleo, y e efectonan di e pandemia di Covid-19.
Tin di corda cu ni 80 kilometer mas leu a bin descubri poz di gas, y esaki a bira un incentivo pa companianan inverti casi 2 miyon Dollar pa start e trabao aki, y esaki lo ta un empuhe pa e economia di e region Caribense di Colombia.
