Presidente mr. Edgard Vrolijk den un epoca dificil tin un reto nobo - *E crisis financiero na 2017 a duna prueba di peliger di secrecia - *Exigencia legal di transparencia ta duna contenido na Voz di Pueblo
ORANJESTAD(AAN)—Aruba a drenta un epoca nobo.
Na momento cu e constelacion nobo di Parlamento di Aruba a eligi, tabata conoci cu nan lo mester introduci e pais na un destino cu ta completamente diferente for di loke Aruba ta laga atras y cu mester nifica recuperacion di Aruba.
Central den e reconstruccion di Aruba, lo ta e regreso di Aruba na su realidad di un Estado di Derecho, den cual ley no ta solamente pa e persona cu no ta tene su mes na reglanan di luznan den trafico riba caretera.
Pa por considera Aruba un Estado di Derecho, Ley mester ta na manda y no loke politiconan kier.
Esaki ta nifica cu mester cera porta pa situacionnan inaceptabel cu a destrui Aruba prome cu Covid-19 a haci su entrada.
Si Reino Hulandes a pone Aruba bou supervision y asina a scrap autonomia hancra den Status Aparte na 2015, ta pasobra Gobierno di Aruba cu asistencia di e miembronan di Parlamento cu a sostene, a trapa riba leynan di Aruba y a destrui Aruba.
Ta hustamente pa evita loke a pasa cu Aruba y a provoca e crisis financiero di Aruba cu a rementa na 2017, Leynan ta exigi pa tin transparencia den trabou di Parlamento, cu no por conoce secreto pa Pueblo.
Ora DIARIO lanta para contra tur loke ta parce intento pa cambio Parlamento di Aruba den un centro di redashi y wega barata, ta hustamente pasobra Aruba a wordo destrui ora miembronan di Parlamento a cera cortina pa Pueblo haya prueba di loke nan tabata haci.
Historia ta duna DIARIO tur motibo pa considera e grupo di Miembronan di Parlamento cu a sostene Gabinete Mike Eman, como complice di destruccion di e sistema democratico di Aruba pasobra nan a cera e cortinan di Parlamento cu mester ta habri, pa asina Pueblo no mira con nan tabata aproba e forma cu Gobierno di Mike Eman a destrui Aruba.
Cu prueba den man, DIARIO for di 2018 a mustra con Gobierno Mike Eman cu aprobacion di e miembronan di fraccion di AVP cu tabata tin mayoria, a hiba Aruba na un caida fatal.
E solo hecho cu ta na 2018, DIARIO por a duna Aruba e pruebanan pa esaki, ta demostra cu Pueblo ni sikiera medionan di comunicacion y oposicion, tabata na haltura kico realmente tabata pasa den Parlamento.
Ta ora e pruebanan a cay den nos man, nos a habri wowo di Pueblo pa loke a pasa tras di e cortinanan cu e mayoria di AVP a cera pa Pueblo loke a haci cu Gobierno Mike Eman por a destrui Aruba manera el a haci.
Relatonan importante di loke baha BBO lo a haci cu Aruba, a keda scondi y Pueblo no a mira e consehonan di por ehempel Raad van Advies, cu a bisa cu Aruba lo zink!
E mayoria di AVP den Gobierno a entrega Mike Eman 1.6 Biyon pa e hunga politica y a scrap nan deber di mira kico Mike Eman y Benny Sevinger tabata haci cu e placa na forma scondi cu ni Reino por a mira.
Ta investigacion di Algemene Rekenkamer Aruba te na 2017 a trece e berdad dilanti pero Benny Sevinger a logra sconde e rapport cu a bini dilanti ora Gobierno a cambia y Aruba a wordo horca cu debenan pa e paga.
Citgo tabata otro wega cu Pueblo den cual Parlamento a yuda Mike Eman firma y mara Aruba na Nicolas Maduro. Den esaki a kibra Ley y nenga hasta oposicion di mira e acuerdo cu na 2018 (ora Mike a bay cas) Pueblo por a mira.
Awe Aruba mester recupera e Estado di Derecho den cual realmente Parlamento ta representa Aruba y ta lucha pa e bienestar di e pais.
E acuerdo cu Prome Ministro Wever-Croes a firma cu Reino Hulandes no ta solamente pa placa pa cubri Covid-19 pero pa debolbe Aruba e sistema democratico cu a wordo destrui durante e periodo 2009-2017.
Awe, ora analisa con Miembronan di Parlamento di AVP a cera cortina di democracia pa Gobierno Mike Eman por a destrui autonomia, mester exigi cu transparencia di Parlamento ta bira realidad.
Redashi y wega mester caba den Parlamento pa asina evita cu historia di Gobierno Mike Eman lo ripiti den secrecia di Parlamento.
Den un situacion mundial sumamente dificil, Aruba mester sigui cana pa futuro.
Presidente di Parlamento, mr. Edgard Vrolijk, tin e deber pa reconstrui e base democratico cu ta exigi pa Pueblo ricibi tur documento cu ta drenta Parlamento y pa ley ta publico.
Den reconstruccion di democracia, cu ta base di e acuerdo cu Aruba a logra cu Hulanda na 2020, Parlamento mester ta Voz di Pueblo cu ta evita cu historia di 2009 pa 2017 ta ripiti y un gobierno hipocrita manera Aruba a conoce e tempo, pone Pueblo baila mientras e ta destrui Aruba!
