ORANJESTAD (AAN): : En conexion cu Dia di Betico, diaranson mainta, Minister Endy Croes a bishita Scol Basico Washington.
Na yegada e mandatario di Enseñansa y Deporte a ricibi un caluroso bonbini door di e cabesante Sra. Sharine Curiel, staf, maestro- y alumnonan di e scol.
Despues di a saluda e alumnonan, Minister Endy Croes a sigui pa klas 5 y 6, unda a combersa cu e alumnonan y a duna nan mas informacion di e bida, historia y logronan di nos Libertador.
Na final di e charla, Minister Endy Croes a haci e alumnonan diferente pregunta y remarcabel ta cu nan tabata conoce e historia di Betico, e Lider stima pa su pueblo. Sra. Sharine Curiel, kende ta cabesante di Scol Basico Washington, a indica cu den e ultimo dos simannan e maestronan a siña e alumnonan e historia di ken ta Betico.
Tambe, Sra. Curiel a expresa cu e ta contento cu Minister Endy Croes a duna mas informacion di loke e mes a experencia durante e periodo cu Betico tabata na bida. Alabes a invita Pueblo di Aruba pa celebra Dia di Betico grandemente.
Pa conclui, Minister Endy Croes ta gradici e cabesante di e scol Sra. Sharine Curiel, maestro - y specialmente e alumnonan pa un mainta hopi agradabel. Ban recorda y celebra Dia di Betico pa e herencia bunita cu el a laga atras, nos Status Aparte.
