Parlamentario Ricky Hoek ta elabora riba aprobacion di tres presupuesto:
ORANJESTAD (AAN): Tres presupuesto di Aruba a keda aproba door di Parlamento di Aruba recientemente. Ta trata di presupuesto di Raad van Advies, presupuesto di Algemene Rekenkamer y tambe presupuesto di Parlamento di Aruba.
Riba esaki, Parlamentario di Fraccion di MEP, Ricky Hoek a declara cu esakinan ta presupuestonan sumamente importante mirando cu cada un di e tres institutonan aki ta ‘hoge colleges van staat’, cu ta institutonan independiente cu ta haciendo un trabao hopi importante pa Pais Aruba.
“Manera nos sa, Raad van Advies ta e conseho supremo mas halto cu ta duna conseho na Parlamento, tambe na Gobierno y na Gobernador. Tur loke ta trata nos leynan na Aruba”, a indica.
Hoek a agrega cu Algemene Rekenkamer ta duna conseho directo na Parlamento di Aruba riba e parti financiero pa loke ta maneho di proyectonan cu ta wordo trata na Aruba.
“Tambe, Parlamento di Aruba cu ta e organo di mas halto na nos pais y tambe ta un instituto cu su presupuesto a wordo aproba”, a bisa.
E presupuesto di Parlamento di Aruba a wordo aproba, pero a crece un poco mas mirando cu den e ultimo temponan hopi atencion no a wordo duna na e edificio, pero tambe na otro aspectonan hopi importante di e organo halto aki di nos pais.
Hoek a sigui bisa cu por ehempel, mester habri vacatura pa mas personal pa traha den Parlamento di Aruba, pero tambe pa e renobacion di e edificio cu hopi biaha no ta asina accesibel, mas tanto pa esnan cu ta traha eyden como pa publico en general, mirando cu tin asina hopi trapi den e edificio. Esaki ta keda un problema principalmente pa e personanan cu algun limitacion.
Den cuadro di esaki, tin un parti di e edificio cu mester wordo renoba, amplia, pa crea mas espacionan pa reunionnan di comision, pa oficinanan. Tur esaki ta hinca den e presupuesto di Parlamento di Aruba.
E aprobacion di e tres presupuestonan sigur ta algo hopi positivo pa e tres institutonan importante aki den loke ta nan trabao y nan eficiencia, Parlamentario Hoek a enfatiza.
