A sinti cu cierto caminda tin falta di informacion --- *Diabierna tin reunion di Rijksministerraad
ORANJESTAD (AAN): Endy Croes, Minister di Enseñansa y Deporte, durante un presentacion virtual, diamars atardi, unda el a presenta su maneho di enseñansa 2021-2025 (Enseñansa den Transicion) a splica cu pa loke ta e sindicatonan, nan ta meymey di e negociacionnan.
Ta berdad cu tin un disputa, pero Gobierno di su curazon, henter Conseho di Minister y sigur parlamentarionan cu ta sosteniendo gobierno, kier duna e 12.6% bek.
E mandatario a agrega cu no ta por nada, den su presentacion el a duna un bista financiero. Gobierno a presta caba 904 miyon florin di Hulanda mara na condicion. E suma aki no tabata solamente pa un grupo, pero pa Aruba den totalidad.
Pa haya e placa ey fia, el a wordo mara na condicionnan y no por cera wowo pa nan. Un di e condicionnan ta e 12.6% tot nadere orde, cu Hulanda a bin cu ne na final di 2020 cu ta empeora e situacion, a bisa.
Si gobierno duna e 12.6% y si Hulanda stop di duna e placa di likides cu e aña aki ainda mester casi 400 miyon, e ora Aruba den totalidad ta den un problematica mas grandi, Minister Croes a remarca.
E deseo di gobierno ta pa keda na mesa y transmiti esaki na mediador. Diamars mainta a sinta cu tur e schoolbesturen pa nan tambe ta na altura y a sinti cu cierto caminda tin falta di informacion.
Awe lo tin un otro reunion cu e directivanan di scol pa yuda gobierno pensa kico ta e otro alternativanan cu por keda na mesa y yega na un solucion satisfactorio pa henter e campo di enseñansa y sigur pa e docentenan, a bisa.
Loke tin aworaki riba mesa tabata algun proposicion cu lo por duna bek 5% (pa cobra 100% bek), pero a cambio di esey mester tin otro componentenan pasobra mester keda na e 12.6%, Minister Croes a duna di conoce.
Ainda no por a keda cla cu Hulanda. Diabierna awor riba Rijksministerraad tin e tema aki y pesey ta pidiendo e sindicatonan pa duna un tiki mas tempo pa wak si Hulanda por duna un poco sosten prome cu sigui mira cua avenida tin cu sigui cana hunto, e mandatario a splica, pa conserva y no perhudica e alumnonan.
Finalmente, a indica, awe diaranson, lo tin mas reunion cu e sindicatonan pa mira con por sali for di e periodo aki.
