Scol ta sigui segun orario normal
ORANJESTAD (AAN): Durante diamars a circula e noticia cu scolnan di SKOA lo cuminsa un ora mas laat entrante 2 di Februari. Esaki den cuadro di e descontento cu ta reina cerca e sindicatonan, entre nan SIMAR relaciona cu e recorte di 12.6% di nan salario.
Den e caso aki, SIMAR como tambe e resto di sindicatonan tabata kier impone un recorte den e oranan di trabao, y esaki lo a nifica un recorte den e orario pa e scolnan, cual ta ekivalente na e 87.4% cu ta e diferencia di e 12.6%.
E intencion di SIMAR tabata pa tur kleuterschool y scol primario cuminsa 8:15 am. Pa scolnan secundario manera MAVO, HAVO, VWO, EPB y EPI pa reduci e tempo di e les te na 40 minuut na lugar di 45 minuut.
Den un ultimo informe diamars atardi, SKOA mes a duna di conoce cu pa loke ta e tema aki ainda nan ta den dialogo cu Minister di Enseñansa Endy Croes.
Mientrastanto, den oranan di atardi laat, SIMAR a wordo yama door di Corte di Prome Instancia y poni na altura cu Gobierno a pidi un 'ordemaatregel' cu ta conta pa SIMAR. Despues di e deliberacion cu hues y riba peticion di hues a yega na un acuerdo pa suspende e accion di awe cu tabata tin planea den espera di e 'kortgeding' cu Gobierno a entama contra SIMAR.
Segun presidente di SIMAR, Josephine Albertus, a indica den un rueda di prensa di ultimo ora na oficina di SEPPA, cu e lucha ta sigui, pero ta keda pospone te ora e caso bin dilanti, cual ta premira lo ta entre 24 cu 48 ora.
Tur esaki ta nifica cu no tin ningun cambio pa loke ta orario di scol. Scol lo sigui segun orario normal.
