Minister Dangui Oduber tabata 'guest speaker' durante conferencia 'Phocuswright' na Fort Lauderdale

ORANJESTAD (AAN): Minister di Turismo y Salud Publico sr. Dangui Oduber y tambe como e representante di Gobierno di Aruba a wordo invita como un “guest speaker” pa forma parti di un panel na e conferencia Phocuswright na Fort Lauderdale. 

            E conferencia di Phocuswright aki a toca tema di “YOU, ME & THE MACHINE” un conferencia cu ta enfoca ariba innovacion, solucion, y colaboracion usando tecnologianan moderno pa asina facilita producto, servicio y procesonan pa asina eleva henter industria di turismo. 

            Aruba a anuncia e sistema di Aruba Happy One Pass (AHOP) cu a bin pa mehora un “seamless travel experience” cual lo bay crea un experiencia mucho mas placentero pa e turistanan cu ta bishita nos isla. E sistema aki a keda reconoci internacionalmente como un solucion caminda biaheronan por demostra nan informacion di salud na aerolineanan, hotelnan y otro companianan den e industria di hospitalidad na un manera sigur y discreto. 

            E industria di biahe ta keda transforma cu AI (Artificial Intelligence) y esaki ta paso tecnologia ta keda avansa y e influencia aki ta pone cu awe nos ta bay tin un sistema di Facial Recognition, Facial I.D y Digital Travel Credentials pa asina verifica e pasahero su identidad cu ta bay duna un servicio unico y rapido pa bishitantenan di Aruba.

            Aruba por ta orguyoso pa ta e prome den caribe pa cuminsa cu un plataforma digital y conhunto cu nos partnernan; SITA, Indicio, Imigracion di Aruba, Aruba Tourism Authority, nos ta premira cu pa comienso di 2024 lo por hasi uso di e sistema AHOP aki na Aruba.  

            Minister Oduber su meta y vision ta pa sigui innova y colabora cu diferente socio pa asina por sigui desaroya proyectonan cu ta trece un cambio positivo y progresivo pa nos pais. Henter e industria di hospitalidad por beneficia di e innovacion aki y pa asina nos sigui mehora e calidad di servicio na nos bishitantenan.

            E obhetivo principal di e “Seamless Travel Experience” ta pa fomenta un proceso di biahe ful digitalisa y mas eficiente pa biaha for di y pa Aruba. Minister Oduber semper a kere den e innovacion y a opta pa haci esaki central den e strategia di su maneho y su vision.