MANAGUA, Nicaragua: E candidata di Nicaragua cu den fin di siman a caba di ricibi e corona di Miss Universe 2023,
esta Sheynnis Palacios a confronta problema pasobra a bira conoci cu Gobierno di e dictador Daniel Ortega a duna un ordo di prohibicion pa e regresa bek for di El Salvador pa Nicaragua.
E decision di impedi e regreso di Sheynnis Palacios bek pa Nicaragua a tuma lugar un dia prome cu e certamen final. Pero ora cu a mira cu el a logra gana e titulo maximo di Miss Universe 2023, nan a retrocede e decision, y a elimina e prohibicion.
Tabata Diabierna 17 di November, cu Gobierno a manda un mensahe oficial pa aerolinea Avianca cu nan no por aborda Sheynnis Alondra Palacios Cornejo riba e vuelo di regreso pa Nicaragua. E mensahe tin e texto poni den blokletters: “No abordar a la pasajera nicaragüense”.
E mensahe a bay tambe pa Aeropuerto Internacional Augusto C. Sandino, cu ta unda e vuelo procedente di El Salvador lo a ateriza.
Tur esaki ta bin debi den pasado Sheynnis a yega di protesta contra gobierno di Daniel Ortega. Esey tabata na 2018 ora el a protesta contra e regimen di e dictador, y esaki ta e motibo pakico e Miss tabata biba pafo di Nicaragua prome cu el a gana e certamen nacional.
Gobierno di Nicaragua a descubri cu riba su pagina di Facebook, tin un publicacion haci dia 30 di Juni 2018 unda Sheynnis a mustra cu el a acudi na un manifestacion contra Gobierno, y tabata un marcha pacifico na e capital managua.
Pero awor cu a haya sa cu el a ricibi e titulo maximo, mesora mensahenan a drenta pa cancela a medida. Pues e pais awor ta ricibi’e cu mannan habri.
