Parlamentario Endy Croes: Redtapes MESTER wordo elimina
ORANJESTAD (AAN): Parlamentario Endy Croes durante henter campaña a papia masha hopi di redtapes y burocracia cu ta stroba masha hopi desaroyo. Entre otro a amplia hopi riba redtapes cu ta stagna nos economia pero tambe a papia entre otro di redtapes na DIP, DOW DLV pa nombra algun.
Den Plan di MEP cu a wordo presenta na pueblo durante eleccion 2021 a dedica hopi na e puntonan aki.
/// Mester bin un comision cu un tarea specifico:
Recuperacion di pais Aruba ta depende masha hopi mes di nos recuperacion economico. Nos no por keda depende 100% solamente di turismo. Esaki Pandemia a reconfirma na henter Aruba. Den e fase di recuperacion nos mester dedica den e promer dianan di e proximo gobierno un atencion “total” na nos systema .
Parlamentario Endy Croes no ta cuestiona ningun ley y tampoco kier kibra ningun ley pero gobierno mester pone e “cuadro” di su vision y percura pa e leynan si mester modernisa nan lo mester hasi esaki hopi liher pa agilisa y facilita actornan importante di nos economia. Na 2021 ta imposibel cu ta dura 2 luna pa habri un cuenta di banco mescos ta imposibel cu traspase di tereno etc ta dura asina hopi.
Lo boga pa instala un comision di imediato cu representantenan di varios stakeholders den combinacion cu expertonan apunta pa gobierno cu un tarea specifico pa sondea y recomenda gobierno e cambionan cu mester wordo hasi pa logra esaki. Aruba mester bira un facilitador cu un clima cu ta atrae entrepeuneurnan local y inversionistanan internacional pa asina crea mas pilarnan economico cual ta crea alaves mas cupo di trabou y e spin off cu tanto nos mester di dije.
Nos mester crea un modelo di “Redcarpet” cu ta atractivo y no un systema cu ta spanta cliente. Awor den opinion di Parlamentario Endy Croes esaki no ta asina. Ta bay hasi apelacion di tur actornan pa cumpli cu vision y deseo di gobierno y esaki mester tuma lugar “asap” manera gobierno sinta.
Dentro di esaki un comision lo mester bay traha y bin cu recomendacionnan den cuadro di “colaboracion” cu otro na un mihor manera posibel entre otro Banco Central, Banconan, Kantoornan di Notaris pa nombra algun. Idea final ta pa agilisa tur proceso pa e cliente ta REY atrobe den cas. Nos lo logra esaki y si na caminda mester bini cu cambionan structural y modelonan diferente nos lo pusha den e mihor direccion pa pais Aruba. Nos no mester ta eerste van de klas pa haña un 10 pero nos mester cumpli cu leynan local y internacional den un cuadro husto pa cu recuperacion economico di pais Aruba.
Parlamentario Endy Croes su maximo deseo ta pa logra traha den colaboracion cu tur stakeholders envolvi pa logra e vision di gobierno pa elimina redtapes .
