ORANJESTAD (AAN): Tienda di Educacion ta na caminda pa su 10 aña di existencia brindando servicionan gratis na henter comunidad di Aruba.
Tin varios servicio cu ta wordo duna pa e expertonan di Tienda di Educacion ora ta trata sosten y guia na mayor of educador. E servicionan ta consisti di duna charla, tayer of informacion na diferente scol y tambe gruponan meta.
Un otro servicio importante cu Tienda di Educacion ta brinda ta sosten y guia telefonico via 161 di dialuna pa diabierna di 8 am – 7 pm. Mayor of educador por tuma contacto cu Tienda di Educacion pa cualkier pregunta ora ta trata lantamento di un mucha. Tambe si ta desea un conseho con pa comunica of disciplina un yiu. Por yama of bishita Tienda di Educacion tambe pa un consulta gratis na nan oficina situa den edificio di Centro pa Hoben y Famia, adres Wayaca 68-C.
Algun dia mas y nos muchanan y hobennan lo regresa scol bek despues di un vacacion bon mereci. Sigur un aña escolar tras di lomba cu hopi reto pa nos muchanan y maestronan. Un pabien ainda na mayornan di esnan cu a logra pasa e aña cu exito y na esnan cu no a logra, no laga e obstaculo aki kibra nan soñonan pa futuro. Prome cu aña escolar nobo cuminsa Tienda di Educacion ta comparti algun tips cu mayornan y pueblo di Aruba.
Con pa yuda bo yiu prepara pa bay scol bek of bay un scol nobo?
Vacacion escolar ta yegando na su final y scol ta bay cuminsa bek. Nos ta duna algun tips pa yuda abo como mayor sostene bo yiu ora di bay scol. Sea ta cu e ta bay crèche prome biaha, un otro klas y lo siña conoce otro muchanan, cambio di scol manera di crèche pa kleuter, kleuter pa scol basico of scol basico pa scol secundario. Tur esakinan ta cambio cu ta bon pa para keto na dje. Asina bo por pensa cual efecto e cambio aki por tin riba bo yiu y con bo lo por sostene bo yiu pa e por anda miho cu e cambio.
Recorda tempo cu abo mes a pasa den e cambionan di scol. Para keto na con bo tabata sinti ora abo mester a bay scol bek of bay un scol nobo. Con bo mayornan a yuda abo y kico bo necesidad tabata? Mas tanto bo lo tabata tin e necesidad pa sa cu ta bay ta oke, pa siguridad. Bo tabata kier haya sa kico ta spera bo y con bo lo por anda cu e situacion.
Ora cu bo ta recorda abo lo por sa mihor con bo lo kier y por yuda bo yiu.
Traha tempo pa papia cu bo yiu tocante e cambio pa bay scol. Bo lo por haci uzo di un kalender pa mustra bo yiu cual dia e lo bay scol. Ta bon pa bo repasa con e dia of rutina nobo lo mustra. Bo lo por papia tocante e ora pa lanta ,baña, bisti, come, wordo hiba scol y wordo busca atrobe pa bay cas, na famia of un traimerdia. Palabra ken ta hibe of trece pa e por sa ken pa spera.
Palabra con bo yiu lo kier pa abo sostene riba su prome dia(nan). E kier pa e mayor cu ta hibe baha cu ne of e lo kier baha su so? Porta e ta mas comodo si e mayor ta warda un rato cu ne sinta den auto. Kiermen ta importante pa check pa haya sa kico bo yiu lo desea. Esaki ta depende tambe cuanto aña bo yiu tin. Dimes esun nan mas chikito lo mester di hopi mas sosten cu esun nan mas grandi.
Traha tempo pa bay bishita scol pa asina bo por mustra bo yiu unda e lo bay. Si ta den auto lo ta bon pa core bay hunto pa e por sa e ruta. Si ta bay via bus lo ta bon pa tuma un bus hunto cu ne pa e por wak con esey lo bay. Bay e scol para pafo pa con e ta mustra. Pa mucha chikito cu ta bay crèche bo por palabra pa bo bay cu bo yiu un rato drenta paden pa hunto por descubri e luga nobo. Bo lo por palabra pa haya dianan pa bo yiu por custumbra. Esaki lo por wordo haci den palabracion cu e crèche. Bo lo por palabra cu e prome dia ta djis wak rond hunto e por hunga si e kier.
Di dos dia por bay cu ne keda 15 pa 30 minuut y bay pa laga bo yiu 1 of 2 ora. Asina abo lo por tuma algun dia pa bo yiu por custumbra poco poco na keda na e crèche en bes di laga bo yiu ful un dia di golpi. Bo lo yuda bo yiu ta mas sigur y e proceso lo bay mas trankilo pa boso tur. Splica con e dia lo bay na scol. Papia tocante reglanan di scol. Papia tocante e bel cu lo ring y kico e ta nifica, sea ta pauze of ta cambio di klas. Papia tocante pone atencion y hisa man si e no ta compronde algo pa puntra si juffrouw of meneer por splica di nobo, splica bo yiu cu e juffrouw of meneer t’ey pa yuda e compronde e materia.
Cuminsa cambia rutina bek. Den vacacion escolar e muchanan por a keda lanta mas laat y tabata tin mas tempo liber. Pa yuda nan ahusta poco poco bay bek na rutina di scol. Pa mas conseho of sosten semper por yama Tienda di Educacion na 161. Por comunica cu nan tambe via عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته., bishita e pagina di Facebook y YouTube channel of subi ariba e website www.tdearuba.com pa mas informacion.
Tienda di Educacion ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta. Tur yamada na 161 ta anonimo. Un sonrisa den cara di nos yiu(nan) por haci milager.
Ta importante pa mayor of educador trece alegria pa nos yui(nan) por tin un infancia sano y desaroya positivamente. Bienestar y siguridad di nos muchanan ta responsabilidad di nos tur! Ban cuida y lanta nos muchanan cu hopi amor y compasion pa asina crea futuro generacion sano y di bon boluntad. Ta un bon ehempel pa nos muchanan y haci un diferencia positivo den nan bida.
