LOS ANGELES: Un homber di Guatemala kende durante un pelea a perde como un kwart di su cerebro y su craneo, te cu el a keda desfigura cu un parti hol na su cabez,
lo tin di bay ricibi US$ 58 miyon den compensacion, segun su abogado na Los Angeles a laga sa despues cu sentencia a cay den Corte.
Antonio López Chaj di 40 aña di edad, awor no por papia, tin mester di yudanza pa cana y tin di haya cuido constante despues cu el a wordo gedal severamente pa un Security Guard di un Bar na Los Angeles na April 2010.
Dia 19 di April 2010, Antonio Chaj di 40 aña kende ta un verfdo, tabata na Barra Latina na Los Angeles. Su sobrinonan Eric Chaj y Pedro Chaj como tambe su ruman tabata na e bar cune, ora cu e bartender a nenga di sirbi Eric Chaj pasobra aparentemente el a yama e bartender pa un nomber. E bartender despues a bula for di tras di e bar y a dal Eric Chaj cu algun knuckles di metal na su mokete.
E ora e Security Guard, Emerson Quintanilla a bin scop Eric y a dal Pedro cu un klop, y a spuit pepper spray den cara di Pedro.
Antonio Chaj aki a trata na interveni, pero el a haya un sla duro cu e klop di e Security Guard. Antonio finalmente a haya 8 bati cu e klop na su cabez, prome cu e Security Guard a bay cune pafo, unda el a sigui usa e klop dos biaha pa dal riba su cabez. Despues e Security Guard a scop Antonio seis biaha den su cabez, a gare na su shirt, y despues a pusha y dal su cabez riba e piso di acera cuatro biaha.
Como resultado di e maltrato severo aki, Antonio Chaj a haya herida traumatico na su cabez y cerebro, unda Docternan a haya nan obliga di kita porcion di su craneo y cerebro.
PERDE 25% DI CRANEO:
Antonio Chaj y su sobrinonan a entabla caso den Corte contra e Security Guard Emerson Quintanilla, y e compania di Security Guard, esta DGSP Security & Patrol Services, y tambe Barra Latina y e doño Kim Myhung Hee.
E maltrato aki a laga Antonio Chaj cu heridanan neurologico profundo y permanente cu lo rekeri tratamento y cuido pa resto di suu bida, y un cirugia reconstructivo di su craneo.
E herida riba e homber Guatemalteco ta di tal magnitud, cu e victima a perde 25% di su craneo y su cerebro.
Un hurado den Corte Superior na Los Angeles, cu ta encarga cu parti zuid di Los Angeles, a ordena e compania DGSP Security & Patrol Services pa paga 57,25 miyon Dollar na daño y interes, cu ta bira un di e indemnizacion di mas grandi den e historia hudicial di California pa un caso particular.
E security guard Emerson Quintanilla mes a huy, y te ainda nan no por haye. Tin indicacion cu kizas el a bay sconde na Mexico.
Loke a bin dilanti, ta cu e Security Guard aki hamas a yega di haya les, ni tin permiso pa e tin e klop den su poder y cu el a usa como un arma. Ademas, e no tin e permisonan necesario pa haci e trabao aki. Esaki a pone cu tur e peso awor a bin cay riba e compania DGSP Security & Patrol.
A mustra cu hopi prueba, cu e compania na forma negligente a tuma un Security Guard den servicio, y no a dune ningun clase di supervision, ni tampoco a yude cu training.
NADA DI SCREENING:
Ta asina cu ley di California ta rekeri tur compania di Security Guard, cu den menos di 6 ora cu nan tuma un hende den servicio, nan tin di dune training di 32 ora largo, pa haya sa e forma corecto cu tin di wanta, gara, y controla persona fuera di control. Den Corte a bin realiza cu e Security Guard Quintanilla aki no a haya ningun tipo di training. Tambe compania tin di check si e guardia tin un asina yama ‘Guard Card’ valido, cu ta rekeri na California. Y bo por check facilmente si un carchi asina ta berdad of falso. Pero e compania DGSP no a ni controla of verifica esey. Pues nan a djis tuma hende den servicio sin haci screening.
Pues awor por mira e resultado di tuma hende den servicio sin haci screening! E compania tin di bay paga US$ 58 miyon na un victima. Tin indicacion cu e compania lo por apela e sentencia.
Abogado di Antonio Chaj, a admiti cu su cliente tabata un stranhero ilegal sin papel ora cu e caso aki a socede. Pero toch e veredicto aki pa e heridanan ricibi pa un persona ilegal, ta demostra cu huradonan no ta pone obstaculo ora di indemniza un victima, loke sea su status di inmigracion. El a bisa cu esaki tabata un dia grandi pa e sistema hudicial Mericano.
