ORANJESTAD (AAN): Administracion di Alimento y Remedinan di Merca (FDA) ta cerca di enmenda autorizacionnan di uso di emergencia pa vacunanan Pfizer y Moderna
pa permiti cu personanan sistema inmunologico debil por haya un di tres dosis di vacunanan contra COVID-19.
Un panel di asesor di Centro pa Control y Prevencion di Malesanan (CDC) a reuni na juli y a urgi tuma medidanan pa protege personanan cu sistema inmunologico debil cu dosis adicional, ya cu expertonan di salud a coincidi cu nan ta entre e poblacion mas vulnerable contra e virus, specialmente pa motibo di propagacion di variante Delta na Merca, hopi mas contagioso cu otronan.
E medida lo ta parti di un cambio cu ta refleha un aumento di preocupacion di administracion di presidente Joe Biden riba e personanan aki, y ta nifica cu personanan cu sistema debil, por ehempel, cu cierto tipo di cancer, por haya un di tres dosis di refuerzo di manera legal. Expertonan a splica cu esaki lo ta un alternativa mas sigur na lugar di busca un dosis riba nan cuenta.
E grupo asesor di CDC ta programa pa reuni riba diabierna pa vota si nan ta recomenda oficialmente un di tres vacuna pa personanan cu sistema inmunologico debil, ya cu esaki mester di aprobacion di panel prome cu docternan por cuminsa prescribi dosis adicional. E votacion solamente ta tuma lugar despues cu FDA tuma medidanan reglamentario, manera e enmienda spera pa autorizacion di uso di emergencia.
E autorizacion di uso di emergencia no ta inclui personanan completamente vacuna.
Anthony Fauci, principal asesor medico di Cas Blanco a declara siman pasa: “Datonan ta mustra sin duda cu pashentnan aki mester di dosis adicional”.
