Mercado di timeshare ta contribui na casi un 30% di nos huespednan

Parlamentario Jennifer Arends-Reyes:

ORANJESTAD (AAN): Parlamentario di AVP, Jennifer Arends-Reyes, lider di fraccion y alavez president di comision di turismo ta gradici ATSA (The Aruba Timeshare Association) y su recientemente nombra president, Sulaika Kelly, pa e invitacion cordial pa asisti un atardi inspirador den compania di varios actor importante den sector di turismo, particularmente den sector di timeshare.

   Durante e evento, a pone enfasis riba e crecemento sostenibel cu e sector a conoce den e ultimo decadanan. E sector di timeshare ta representa actualmente casi 30% di e cantidad total di huesped cu ta yega Aruba, convirtiendo asina den un pilar crucial den e industria di turismo di nos isla.

   Lider di fraccion di AVP a presencia tambe e premiere di un documentario tocante e evolucion di timeshare na Aruba caminda a resalta e balor principal di e sector su capacidad pa atrae repeated guests– bishitantenan cu ta bolbe cu amor y lealtad pa Aruba, generacion tras generacion. E compromiso constante di ATSA y su miembronan pa calidad, stabilidad y desaroyo ta otro ehempel pa otro sectornan.

AVP ta sigui comprometi na sostene e colaboracion cu e sector turistico, reconociendo e papel vital cu timeshare ta hunga den nos economia y bienestar social.

   Parlamentario Arends-Reyes, den nomber di henter fraccion, ta desea Señora Sulaika Kelly hopi exito den su liderato, y ta confia cu bou di su direccion, ATSA lo sigui prospera y contribui na un Aruba fuerte y hospitalario.