MEP cu reconocimento na lider di partido Evelyn Wever-Croes pa su 10 aña como lider partido

ORANJESTAD (AAN): Lider di MEP Evelyn Wever – Croes a keda asombra y agradecido pa e muestra di aprecio ricibi for di henter e famia di MEP.

            Durante un encuentro chikito pa tene cuenta cu reglanan di Covid, Partido a sorprende e Lider di MEP cu un bunita regalo en conexion cu su 10 aña como lider di MEP. Primeramente el a gradici Dios pa tur cos y a enfatisa cu e trabou di lider no ta uno cu un persona por haci su so, e ta un trabou di ekipo.

            Señora Wever-Croes a bisa cu, “awor por wak bek na 10 aña cu hopi reto, pero tambe yena cu momentonan bunita, danki na cada colega cu a yuda pa hiba e Partido dilanti, haciendo MEP e Partido di mas grandi na Aruba”.

            Parlamentario y Presidente di Partido MEP, sr. Hendrik Tevreden a entrega Lider di MEP un bunita recuerdo cu e bunita palabranan graba: ‘Pabien. 10 aña Lider di MEP. E prome lider di MEP femenino. E prome Minister President Femenino di Aruba. E prome votegetter femenino di Aruba den eleccion 2021. Danki pa e amor y pasenshi cu bo ta demostra pa guia nos partido y pa goberna Aruba’.