MEP cu mocion pa urgi Gobierno facilita fluho di trafico entre Renaissance Marketplace y Hotel

Parlamentario Setty Christiaans-Yarzagaray:

ORANJESTAD (AAN): Den un sesion reciente den sala di Parlamento durante tratamento di Presupuesto di Dienst Openbare Werken (DOW) pa aña 2024, Fraccion di MEP a entrega un mocion cu ta un iniciativa di Parlamentario Setty Christiaans-Yarzagaray.

   E mocion ta subraya e problematica cu ta enfrenta na e caminda entre Parlamento y Royal Plaza riba L.G. Smith Boulevard. Segun MEP, e ruta aki ta hopi congestiona, particularmente durante momentonan cu tin crucero.

   Den e mocion ta haci un yamada di atencion riba e echo cu desde cu no tin bakinan di mata mas riba e ruta entre Parlamento y Renaissance hotel, e dos liña strit a keda cu ta dificulta e fluho y direccion di trafico y ta haci cu automobilistanan ta kibra ley pa crusa caminda na cierto salidanan.

   Pa purba alivia e situacion aki, Fraccion di MEP ta urgi gobierno di Aruba pa pinta e liña meymey di caminda conforme articulo 8 di Landsverordening wegverkeer y articulo 9 di Landsbesluit verkeersregels. Esaki lo crea e posibilidad pa automobilistanan por bira bay ambos banda, yudando asina y evitando e fluho di trafico riba e caminda entre Parlamento y Royal Plaza.

   Fraccion di MEP ta subraya e importancia di tuma accion pa facilita e fluho di trafico, particularmente riba e caminda cu ta vital pa e movimento di local y turistanan den e area.