Lenny Geervliet, lider di proyecto 125:
*Busca un alternativa na tempo
ORANJESTAD (AAN) – Den e temporada aki di carnaval, instancianan concerni no solamente ta duna atencion na e bienestar di e muchanan chikito, stimulando mayornan pa no hiba nan e paradanan, pero tambe tin cu ta pensa riba e adulto mayor, pa no laga nan so den cas.
Lenny Geervliet, Lider di Proyecto 125 ta haci un yamada na famianan di adulto mayor cu no por percura pa nan mes, pa no laga nan so na cas pasobra esun cu ta wak p’e, sea famia of encarga, kier bay goza di carnaval.
“Mi no ta kita ningun hende di celebra su carnaval, pero bo por hacie na un manera mas responsabel, si bo ta na encargo di un hende grandi. Bo no por laga un hende cu ta depende di bo den un situacion cu hasta por bira peligroso p’e.
Lenny ta aconseha pa busca manera di haya un hende cu no ta bay carnaval, of organiza e cuido prome cu bo bay of laga algo pa e persona come, bebe, tuma su remedi. Si un hende depende di bo, bo no por kit’e pa dos dia, pa bo bay celebra. Esey no ta corecto”, señora Geervliet a indica.
Otro alternativa cu el a trece dilanti ta pa uni un grupo di adulto mayor y busca un hende cu no ta bay carnaval pa atende cu nan. Por ehemplo, pone adultonan mayor hunto den famia cu un hende cu si ta bay tey pa nan, y laga numbernan cu nan por yama si mester di ayudo, mas cu normal.
“Pasobra algo lo por pasa semper, pero si abo ta baiia den carnaval bo no ta scucha bo telefon. Bo no por carga responsabilidad pa un hende grandi anto bo sa cu bo tin cu bay baila den carnaval sabiendo concientemente cu e adulto mayor aki no por wak pa si mes. Esey no por!” Lenny Geervliet a reitera.
