ORANJESTAD (AAN):Den cuadro di e Conferencia di Embahadornan di Reino Hulandes teni siman pasa diabierna, Prome Minister di Aruba, mr. Mike Eman,
a ricibi bishita di Sra. Carmen Gonsalves, Charge d’Affairs di Reino Hulandes staciona na Caracas, Venezuela.
E reunion a tuma luga den un ambiente di cordialidad y respet mutuo, y a sirbi como un plataforma pa intercambia idea riba cooperacion regional y e fortalecimento di e laso historico entre Aruba y Venezuela.
Durante e encuentro, Gonsalves a expresa su admiracion pa e liderato y vision di Prome Minister Eman:
“Tabata un combersacion sumamente inspirado. Aruba tin un Premier cu un vision cla y detaya pa e futuro di e isla bunita aki. Esaki ta duna mi inspiracion pa mira con mi, den mi funcion, por contribui tambe na e vision aki.”
E Charge d’Affairs a referi specificamente na e plannan di reforestacion y e cooperacion cu Universidad di Wageningen, un proyecto cu ta habri caminda pa proteccion di medio ambiente y desaroyo sostenibel na Aruba. Ademas Gonsalves a destaca cu e Premier a menciona un tipo di mata cu ta crece na costa di Aruba y tambe na costa di Venezuela, un simbolo natural di e union profundo entre e dos pueblonan.
“E ehempel aki ta mustra cu e relacion entre Aruba y Venezuela ta bay hopi leu atras, y nos ta compromete pa sigui fortalece e cooperacion. Nos ta traha pa crea e condicionnan pa un colaboracion positivo y pa enfrenta e retonan actual cu diplomacia y respet.”
E encuentro cu Gonsalves ta reafirma un vision comun: un Caribe Hulandes fuerte, uni y sostenibel, basa riba cooperacion, amistad y progreso comparti.
