Masha bunita celebracion protocolar y cultural pa celebra Aruba su Dia di Himno y Bandera

Publico grandi a presenta na Plaza Betico Croes:

ORANJESTAD (AAN) – Hopi bunita acto protocolar y cultural a tuma lugar Dialuna mainta, cuminzando pa 9’or, cu yegada di Gobernador señor Alfonso Boekhoudt, Parlamentario, Ministernan, Representantenan di e Gobiernonan di Curacao y Bonaire,  demas invitado y un bon publico cu a yega Plaza Betico Croes for di mas trempan.

            E Acto protocolar a cuminza cu entonacion di Aruba su Himno Nacional, despues cu hobennan Scout Aruba a hisa bandera. Seguidamente, un momento spiritual na encargo di Pader Gibert Kelly, cu a haci un bunita oracion pa gradici Dios pa e Dia aki y pa bendiciona tur presente y pueblo di Aruba en general. Minister Presidente a hiba su discurso den cual a resalta e balor di Aruba su Himno y Bandera, como un pais cu tambe a hiba un lucha cu a hib’e na bira un Pais autonomo den Reino Hulandes.

            E Coro Nacional di Mucha forma pa alumnonan di diferente scol primario a canta nos Himno Aruba Dushi Tera, dirigi pa meneer Eltienne   Yarzagaray y Juffrouw Maybelline Arends-Croes. Nan a sigui interpreta diferente otro cantica.

            A sigui cu presentacion di e Ganador Absoluto di e Festival Un Canto pa Aruba su Himno y Bandera, e hobencito Katai de Jong cu su cantica “Mas Sabi cu Shoko”, despues a sigui cu presentacion di e cantica “Ban hisa nos bandera” di Edselyn Figaroa, interpreta pa e Coro Nacional di Mucha.

            Seguidamente Jhon Freddy Tobon Montoya, ganado absolution di Poeta di Patria a declama su poema “Ki Bal”. A clausura e parti aki cu presentacion di e grupo “Aruba Orguyo di Nos Tur.

            Despues cu e comite Celebracion Fiestanan Nacional, a dispidi Gobernador Alfonso Boekhoudt, a sigui e di dos parti di e ceremonia cu a consisti di e desfile di gruponan uniforma, tanto gubernamental como deportivo, social y cultural.

            Pa clausura e ceremonia, un grupo cultural su brass band a para toca mientras e grupo di baile a balia na su ritmo, entre otro musica di carnaval y por a mira diferente invitado, Minister Presidente y Minister di Cultura a uni y balia na nan ritmo, alegria y colorido. Un clausura sigur bunita y diferente cu un curazon Arubiano gigantesco.