Mas y mas inmigrante ta siñando Papiamento y ta integrando den mercado laboral di Aruba

Importancia di Integracion di Inmigrantenan y Siñamento di Idioma

ORANJESTAD (AAN):  Den e mundo di awe, unda inmigracion ta un tema cu ta keda bin dilanti, ta importante pa enfatisa e balor di integracion di e inmigrantenan den e paisnan cu nan ta bin biba, asina tambe e importancia di nan siña e idioma local.

            Den nos comunidad, nos ta ricibi un gran cantidad di hende cu ta busca un miho calidad di bida, buscando oportunidadnan pa nan mes y nan famia. Tambe tin esnan cu pa motibonan familiar of laboral mester a bay biba na un otro pais cu no ta esun cu a wak nan nace pa keda biba eynan pa resto di nan bida. Pa nan logra esaki, integracion den e pais huesped ta esencial.

            Na momento cu ta integra hendenan di diferente pais den nos comunidad, nos ta enrikece nos mes. Cada persona ta trece cu nan un bagage di nan cultura, nan historia, y nan identidad, haci nos un comunidad mas diverso y vibrante. Un comunidad multicultural. Esaki ta crea un ambiente caminda tur hende por siña for di otro, comprende otro y crece hunto.

            Pa por ta parti di e comunidad local, ta vital pa e inmigrantenan siña e idioma di e pais. Siña e idioma local cu ta habri porta pa nan den e mundo laboral, social y educativo. E ta duna nan e habilidad pa comunica y comprende nan coleganan, bisiñanan y autoridadnan local. Ta un paso importante pa nan integracion y pa nan logra nan meta di establece nan bida den e pais nobo.

            Ademas, siñamento di e idioma local, den e caso aki Papiamento, ta mustra respet pa e isla y e hendenan cu ta biba den dje. Ta un manera di demostra interes den e cultura y e forma di bida local. E ta crea un bon sentimento di pertenencia y solidaridad entre hendenan di diferente origen.

            Pa conclui, integracion di inmigrantenan y e siñamento di e idioma local ta un proceso vital pa un comunidad prospero y harmonioso. E ta enrikece nos comunidad cu diversidad y ta habri oportunidad pa tur hende. Den e mundo unda nos ta keda uni, esaki ta di balor incalculabel pa nos futuro y desaroyo comun.

            Na Aruba tin personanan cu ta forma parti di un generacion nobo di inmigrantenan cu ta hopi interesa den siña Papiamento. Ta trata precisamente di personanan di diferente pais, manera Colombia, Venezuela, Brasil, Mexico, entre otro cu ta formando parti di e mercado laboral caba y otronan cu ta den proceso pa integra mas y mas sea social como laboralmente.

            Actualmente, e Fundacion Venearuba Solidaria (La Casa del Venezolano) ta ofrece cursonan di idioma gratuitamente na personanan di tur nacionalidad. Pa medio di fondonan cu ta wordo otorga pa proyectonan asina balioso manera esun aki di brinda e oportunidad di siña Papiamento of Ingles, e inmigrante por integra mas facilmente den e comunidad.

            DIARIO a haya sa cu aworaki Venearuba tin inscripcion habri pa curso di idioma. Y e ta sin costo! 

            Riba potret, por aprecia un grupo di persona di diferente nacionalidad cu a finalisa exitosamente e curso di Papiamento di Fundacion Venearuba y a sigui interesa den siña mas y combersa mas.

            Nan a tene un sesion special caminda nan a comparti un desayuno y un combersatorio cu Linguista Ramon Todd-Dandare. Tabata sigur un ocasion di luho pa siña mas di e origen di Papiamento y referi na dudanan tocante gramatica y ortografia.