Coreccion:
ORANJESTAD (AAN) Un informe incorecto a sali publica den DIARIO di 13 di Februari. Door di un malinterpretacion, DIARIO a publica cu NV Elmar tin instalador di Solar Panel.
Mas bien loke Audrey Croes, Relacionista Publico di NV Elmar a trece dilanti, ta cu e instaladornan reconoci pa Departamento di DTI ta e uniconan cu por representa e cliente di NV Elmar den e proceso di inspeccion.
Keuringmeester di Elmar, Keuringmeester di DTI y Instaladonan reconoci ta envolvi den e proceso di inspeccion di solar panel, segun Audrey Croes.
Croes a menciona cu e peticion pa inspeccion por wordo haci online via ELMAR su CE portal, unda henter e proceso ta cana y e clientenan por haya e status di nan peticion.
E cliente por drenta e portal cu e SR nummer di e peticion, of si e instalado reconoci agrega e email di e cliente den e portal.
E cliente residencial por instala un maximo di 10 kiloWatt di solar panel, esaki ta depende di e ultimo cantidad di capacidad di coriente den su instalacion cu el a keur. E promedio cantidad di capacidad di energia solar cu clientenan residencial ta uza ta 7 kilowatt.
E energia solar ta fluctua continuamente. E surplus di produccion di energia cu ta wordo manda bek den e grid di coriente ta wordo considera como vervuiling di e grid na paisnan manera Hulanda. E pushamento bek den e grid ta haci e voltahe di e grid instabil. Pa e motibo aki, tin distribuidor na Hulanda cu ta cobra e cliente pa e surplus di produccion aki.
Den e caso di NV Elmar e clientenan ta ricibi un porcentahe di e prijs di coriente, basa riba e cantidad di surplus na final di luna di produccion di energia cu ta wordo manda bek de e grid. Esey ta e diferencia. Sinembargo, e intencion no ta pusha energia solar den e grid, pero pa e cliente instala e capacidad cu e ta uza.
NV Elmar ta recomenda pa haci un peticion di aprobacion preliminario (di antemano) den e CE portal di Elmar prome cu haci un inversion den solar panel. Tin cierto areanan cu ta satura, mirando e demanda di solar panel. Elmar ta suministra coriente den un rango di voltahe pa garantiza un suministro di coriente confiabel. Pa e motibo aki, Elmar ta tene un proceso di inspeccion y controla e voltahe di e suministro di energia alternativo, specialmente pa proteha e grid y e clientenan.
