MAICAO: Na Colombia un accion combina di Polis hunto cu mas instancia di inteligencia, a yuda nan logra confisca un cargamento di mas di 1 ton di marihuana,
cu tabata parti paden di un truck cu nan a warda den un parkinglot di municipio di Maicao na departamento La Guajira.
E droga a wordo haya como resultado di un razzia cu nan a haci na e parkinglot aki. Ora nan a bay controla un truck grandi cu trekker, a bin haya 1.638 paki comprimi di marihuana, specificamente e tipo di marihuana cu mas ta wordo busca internacionalmente. Ora cu a pisa esaki, el a yega na 819 kilo.
Den e investigacion aki, e Seccion di Investigacion Criminal, y tambe Interpol tabata envolvi. Ningun hende a resulta deteni, pasobra parce cu e traficantenan a core sconde ora nan a mira asina hopi Polis yega na e lugar.
E mesun dia, a tene un otro razzia na un cas di bario Divino Niño na Maicao, unda a bin haya 438 paki comprimi di marihuana. Esaki a yega na un peso di 275 kilo di marihuana tipo creepy.
Aki tampoco no a detene ningun hende, pasobra esnan cu tabata cuida e droga a logra huy net prome cu Polis a yega.
