RIOHACHA: Siman pasa durante un operacion combina di Forza Aereo y Armada di Colombia, a logra stop un speedboat tipo Go-Fast cu tabata moviendo cu abordo un Colombiano y un Dominicano.
Nan tabata transportando mas di 340 kilo di droga, cu aparentemente tabata rumbo pa un waf na Republica Dominicana.
Finalmente ta un unidad di Guardacosta di Colombia a intercepta e Go-Fast aki na 19 miya panort di Puerto Bolivar, na departamento di La Guajira. Abordo a bin haya 16 bulto, y den nan un total di 488 paki rectangular cu ta esnan costumbra cu traficantenan ta usa. A confisca tambe un pistol y 11 cartucho di municion di diferente caliber.
Ora di yega tera bek, a habri e pakinan aki. A bin descubri cu 202.9 kilo ta di cocaina. Tambe a haya 139.9 kilo di marihuana.
