Maria College tambe a participa na Hackathon pa haya sa pakico alumnonan a perde interes den deporte

ORANJESTAD (AAN): Recientemente a tuma lugar un Hackathon na e Café di John F. Kennedy Learning Center na Playa. 

Esaki a wordo organiza pa Aisha Radjouki, un stagaire di Hogeschool Rotterdam.

   E ta finalisando cu su estudio, y a bin core stage na IBiSA na Aruba.  El a dirigi su estudio y investigacion riba e caida di participantenan den eventonan deportivo cerca Scolnan Avanza.  E ta spera di por haya sa, ademas di e motibonan pakico menos alumno ta participando, pa haya sa kico tin di bay cambia pa asina por pone e participacion subi bek.

   Den cuadro di esey, el a organiza un Hackathon.  Varios scol a wordo invita pa a participa na esaki.  Di como 10 diferente scol cu a wordo invita, solamente Maria College MAVO y Abraham de Veerschool MAVO a participa na dje.

   Pa Maria College MAVO a participa Amayla Vrieswijk, Aaron de Jesus, Nova Canales, y Jordan Browne.  Nan a wordo guia door di nan docente di gym, esta Romar Arendsz.

   E Hackathon a dura 4 ora cu workshop, analisis di e problema, tambe a brainstorm pa un wega nobo, organiz’e y ehecut’e.  Ambos scol a ricibi un certificado.