Lo sigui expande riba proyectonan di camara di vigilancia y radar

Minister Rocco Tjon:

ORANJESTAD (AAN): Recientemente, Minister di Husticia y Asuntonan Social Sr. Rocco Tjon, a elabora riba algun proyecto hudicial cu ta di suma importancia pa Ministerio di Husticia, manera e camara di vigilancia y radar. Pa e motibo aki, por bisa cu a haci diferente inversion caba pa cu e proyectonan aki, cual awo lo mira un expansion.

            Manera ta conoci, aña pasa a adkiri radarnan adicional y a renoba e radarkamer. Adicional a percura pa sistemanan automatisa pa por haci analisnan mas profundo, cu consecuentemente por dirigi patruyanan mas eficiente elevando e nivel di siguridad. Ta bay sigui inverti den e proyectonan aki, pa cual motibo, lo bay bin cu un operation center dentro di poco, caminda ekiponan multidisciplinario lo bay keda encarga cu e tareanan aki.

            Diaranson mainta, e mandatario a reuni cu comandante di Kazerne y Korpschef, pa asina sondea e posibilidadnan pa un colaboracion cu Kazerne pa cu e proyectonan aki. Banda di esaki, den cuadro di e landspakket, tin diferente proyecto andando cu Kazerne den e caso aki, pa loke ta e empleamento di nos Arumillers, como tambe pa un “outplacement” mas husto pa cu Arumillers, pa nan no cay den un bashi despues cu nan termino na kazerne yega su final. Durante e reunion aki a explora e diferente posibilidadnan cu tin. Esaki door cu dentro di poco lo haya aprobacion pa e siguiente fasenan, caminda e proyecto di camara y radar lo bay bira uno mucho mas grandi, caminda cooperacion di ful e cadena ta sumamente necesario.

            Pues, un reunion sumamente positivo, caminda dentro di dos siman, nos lo sinta bek cu otro pa asina delibera cua personal di Kazerne lo por asisti cu e proyectonan aki y con por duna esaki mas contenido pa asina yega na un ekipo multidisciplinario den cual Kazerne y Arumil mas specificamente lo forma parti di dje.