Despedida ta Diasabra awor --- ORANJESTAD (AAN): Den un siman di tempo, un Comision a wordo lanta pa asina hunto cu famia nan por a coordina y organiza un Despedida grandi pa e conocido baluarte local,
esta e locutor Roberto Geerman kende a fayece siman pasa.
Un di esnan cu a participa den e Comision ta Stanley Dabian di Departamento di Cultura Aruba. El a splica cu ora bo papia di Roberto, bo ta papia di Encyclopedia Bibo den su ramo, y den tur loke el a haci. Roberto ta un persona hopi servicial y semper ta cla pa yuda tur esnan cu por a pidi’e algo.
Mesora ora cu Departamento di Cultura (DCA) a wordo acerca door di e Comision, a dicidi mesora di duna un man y ta trahando riba e programa di Diasabra awor. Corda cu e no ta un fiesta, ni concierto, ni Carnaval, sino un tributo na un gran persona cu a duna hopi di dje na comunidad.
Pa esaki, ta preparando e programa cu ta Diasabra 29 di Januari 2022 riba plenchi Santa Teresita for di 11:00 am te cu 2:00 pm, y y tambe e programa cu ta den Misa cu ta pa e famia despues di 2:30 pm. E parti riba plenchi dilanti Misa Santa Teresita lo tin varios cantante local ta duna presentacion, y tambe agrupacion musical cu ta dunando nan respet y tributo na Roberto.
DCA a bisa cu Ko Fung di High-Performance lo bay coopera cu instalacion di sonido. Si tin cualkier artista local cu kier duna presentacion, por contact Mieckey Gravenhorst pa coordina algo.
