Ashantee Martus a yega Aruba bek cu e titulo maximo di Teen Cultura Continental 2022

ORANJESTAD (AAN): Tabata Diasabra anochi cu un biaha mas e nomber di Aruba a keda pusha den halto, ora cu Ashantee Martus a sa di conquista e titulo maximo di Teen Cultura Continental 2022 na e ciudad di Siguatepeque na Honduras.

   Ashantee Martus a sa di comporta su mes henter siman manera un reina, lanta trempan pa mustra disciplina, y mustra amabilidad di nos hendenan.  Esey a keda refleha tambe riba escenario.

   E organizador di Miss Teen Aruba International, esta George Winterdaal, a splica cu Ashantee a bay tambe cu e premio di ‘Mihor Danza Folclorico 2022’, unda el a demostra nan kico ta dushi di e cultura di Aruba.

   Ashantee a demostra confianza total cu su Trahe Nacional riba escenario, y el a bay cu e titulo tambe pa Mejor Traje Nacional.

   Anto e Trahe Nacional aki ta uno cu casi a pone e delegacion di Aruba perdenan vuelo.  Aerolinea a haci dificil pa transporta esaki, y el a yega Honduras tur machica.  Pero nan a haci e magia y el a logra bay cu e titulo tambe di esey.

   Diamars merdia, famia y amigonan tabata presente den VIP Room di Aeropuerto di Aruba, ora cu Ashantee cu su delegacion, incluyendo mama Miriam a yega bek Aruba.

   Ora e porta di VIP Room a habri, Ashantee a wordo saluda pa su dos welanan, y un monton di famia, amigo, y tambe candidatanan cu tin hopi amistad cune.  Su preparador Endy Croes tambe a haci e viahe cune.

   Na su yegada, Ashantee a ricibi un puppy masha tierno mes como regalo pa su gran logro.  Y e tabatin un sonrisa constante di orea pa orea pa saluda tur hende.  Pabien na Ashantee, y pabien na Aruba.