Let's Art About Mental Health tabata un evento exitoso pa crea conscientisacion

ORANJESTAD (AAN): Diasabra, 23 di october a tuma luga un evento di conscientisacion riba e topico di Salud Mental y Adiccion: Let's Art About Mental Health.

E evento aki a tuma luga na Ateliers' 89 y a combina e uzo di arte cu salud mental.

            E evento a habri cu Art Therapy, unda cu Vaktherapeut Sra. Marleen de Valk a duna un workshop unda cu participantenan por a siña con pa uza arte pa expresa nan emocionnan y tambe crea un obra di arte hunto.

            Despues di esaki portanan a habri pa Aruba su prome Feria di Salud Mental unda cu bishitantenan por a disfruta di workshops gratis pa ambos adulto y mucha, benta di varios obra di arte local y por a bishita diferente stand di informacion pa haya mas informacion tocante cuido di salud mental y adiccion riba nos isla. Pa nos muchanan tabatin un kids’ corner cu varios actividad cu nan por a participa na dje.

            E evento aki tabata un exito rotundo. Kier a yama danki na tur cu a contribui di un forma of otro y cu bishit, na tur boluntario cu a duna un man durante e evento y finalmente na e partnernan, Ateliers' 89 Punto di Beyas Arte Aruba, Miss Aruba Organization, Cosecha, FADA, FMAA, Jordan Ling Foundation, Plataforma Promocion di Salud, FSMA Respaldo, SPD, DVG y IBiSA.   

            Tambe ta sumamente agradecido na e sponsornan. Danki na nan aporte y sosten por a tene e evento aki gratis pa comunidad di Aruba.
            Ta spera cu e bishitantenan a pasa un rato agradabel durante e feria aki.