ORANJESTAD (AAN): Un remedi pa trata COVID-19, elabora pa laboratorio mericano Pfizer, por ta disponible e aña aki si nan haya autorizacion, fuentenan di e compania a informa.
E remedi oral por wordo usa pa trata pashentnan ya infecta of como medida preventivo pa evita cu e virus expande den un hogar, despues cu un miembro di famia a contagia cu e virus.
Ehecutivonan di Pfizer a informa cu tratamento ta mustra señalnan efectivo contra varios variante di e virus, y nan ta optimista mientras nan ta warda datonan di e investigacion cu por ta cla pa fin di aña.
“Esaki ta un remedi realmente importante pa mundo... laga nos cruza nos dedenan mientras nos ta wardando e resultadonan”, segun director cientifico di Pfizer, Mikael Dolsten.
Den caso cu estudio y analisis di parti di departamentonan sanitario resulta positivo, e compania por aumenta e produccion di e remedi aki pa otro aña.
Actualmente, e laboratorio mericano Merck ta wardando pa agencianan di salud di e pais y esnan europeo duna autorizacion di emergencia na su pildo contra Covid-19, un remedi facil pa administra.
E tratamento di molnupiravir, administra na pashentnan algun dia despues di test positivo, ta reduci na mita e riesgo di hospitalizacion y morto, segun un ensayo clinico realiza pa Merck, tambe conoci como MSD pafor di Merca.
-Pfizer a aumenta nan prevision di beneficionan
Pfizer, mientrastanto, a hisa su estimacion di entradanan anual pa su vacuna contra covid Comirnaty, cu ta desaroya hunto cu compania biotecnologico aleman BioNTech, danki na un demanda fuerte pafor di Merca.
Awo e compania ta spera di por bende e vacuna e aña aki pa 36.000 miyon di dollar, cuando e anterior prevision tabata di 33.500 miyon.
Pfizer tambe tin previsto suministra 2.300 miyon di vacuna rond di mundo.
