Leonides Geerman escogi como Empleado di Luna na Hospital  

Un trahador dedica y cu multi-talento

ORANJESTAD (AAN): E empleada Leonides Geerman, kende ta asistent di docter na Policlinica di medicina interno, a hay’e straño cu diripente tabatin un cita y cu su manager mes a dune lift pa hunto nan bay. Manera semper pa tur ocasion, e departamento a decora pa dia di San Valentin, pero e biaha aki tras di su lomba a decora specialmente pe tambe. Asina cu el a pasa e decoracion di San Valentin y el a drenta e sala di reunion el a topa cu un sala yen di colega, famia, specialista y miembro di  Hunta di Directiva Jacco Vroegop cu e grito di ‘surprise’. Un ‘shock’ grandi pero bunita cu e no a spera y sigur cu nunca e lo lubida.

   Leonie ta un trahador masha profesional cu no solamente ta yuda pashentnan pero tambe ta yuda e docternan den diferente forma. E ta yuda nan cu traduccion, den duna medicamento, ta maneha administracion y ta asisti na diferente actividad extra-curricular. Leonie ta un tremendo teamplayer cu ta traha cu tur hende sigurando cu e procesonan ta cana suave. E ta stima su trabao, tin comprension pe pashentnan percurando cu nan ta worde scucha y contesta sea telefonicamente, via WhatsApp, email of na balie.

   Su manera di trata pashent ta duna nan confianza. E no ta husga y ta crea un ambiente unda pashent y tambe colega ta sinti nan mes sigur unda por expresa preocupacionnan na un manera trankil. Su accesibilidad y confianza ta un ‘yabi’ esencial den e team.

   Nada ta dimas pa Leonie. E ta un persona practico y eficiente, tin semper su tareanan cla den e tempo stipula y netchi regla. E ta traha duro y ta bay ‘the extra mile’ pa sigura cu su servicio di asistencia pa pashent- y docternan ta optimal. Ademas, Leonie ta un atleta talentoso cu ta duna un imagen saludabel y positivo ne policlinica unda cu su estilo di bida deportivo ta contribui ne ambiente di energia y vitalidad na trabao.

   Su motivacion y dedicacion ta un ehempel pa tur. Leonie merece e reconocemento aki, paso sin dje, e policlinica no lo draai mesun eficiente. Hunta di Directiva, management y coleganan ta hopi contento y orguyoso di tin Leonie den team di HOH. Masha pabien cu e bunita titulo di empleado di luna di Februari 2025.