Minister Geoffrey Wever:
"E ta un decision cu ta haci dolor, pero cu ta necesario"
ORANJESTAD (AAN): Minister di Asunto Economico, Comunicacion y Desaroyo Sostenibel, Geoffrey Wever, a expresa diahuebs mainta durante un conferencia di prensa cu preferibelmente e lo tabata kier anuncia un noticia diferente pa comunidad, pero parti di e trabao di gobierno ta pa informa pueblo debidamente riba e desaroyonan na Aruba.
"Awe ta mi deber e ora pa informa comunidad cu despues di un evaluacion grandi, largo haci hunto den e caso aki cu Arugas, a yega na e decision cu mester aumenta e prijs maximo pa cual por bende e bomnan di gas di 100 liber", a expresa.
Segun Wever, pa hopi aña caba e prijs aki ta maximalisa y di e poco prijsnan cu tin den economia di Aruba, cual ta un economia liber, algun producto ta regula ainda pa gobierno, entre otro e prijs di gas di 100 liber. Esaki tabata pa añanan caba estableci na Afl. 46,38 pa un cilinder di 100 liber.
Despues di e desaroyonan internacional, entre otro e guera na Ukraine y cu prijs di entre otro, gas a subi, Arugas a haya su mes den dificultadnan financiero pasobra ya e prijs cu nan ta liber pa bende e gas residencial riba mercado na Aruba no ta suficiente pa cubri e gastonan cu nan tin y ni pa cumpra e gas riba mercado internacional, incluyendo e gastonan operacional pa por distribui gas pa e ciudadanonan.
Minister Wever a indica cu e ora a drenta un peticion di Arugas pa revisa e structura y e prijs maximo cu ta permiti pa bende gas residencial. Asina a drenta den combersacionnan y a haci diferente evaluacion. Por a conclui cu pa Arugas ta imposibel pa sigui bende e cilindernan di gas di 100 liber na e prijs di Afl. 46,38.
Ya caba e aña aki, Arugas a hiba un perdida di casi 1,8 miyon florin y lo bira hopi dificil pa nan mantene cabes ariba awa y sigui suministra gas na e comunidad, sino ta bin un ahuste den e prijs, e mandatario a remarca.
Despues di a haci un analisis a acorda cu no lo bay hiba e prijs na un prijs cu ta yuda nan yega na un 'profit', pero simplemente pa nan por 'break even', Wever a expresa. Esaki kiermen cu entrante 15 di November, prijs di gas residencial lo ta bay ta Afl. 60 pa cada cilinder di 100 liber y a reduci e cantidad di 6 pa aña pa 4 pa aña pa cada hogar.
Arugas a tuma nota cu hopi uzo comercial ta tuma lugar cu e boternan di gas di 100 liber y pesey a dicidi cu esaki ta un ahuste cu mester bin pa Arugas por sigui existi y sigui por entrega su suministro di e tankinan di gas, e minister a agrega.
"Esaki ta un decision cu gobierno ta haya necesario, pero naturalmente e ta un decision cu ta haci dolor. Un decision cu nos ta compronde e dificultad cu ta trece cu ne y e ta un decision cu lamentablemente mester wordo tuma pa nos por garantisa cu nos hogarnan tin acceso na gas pa cushina den nan hogarnan", a bisa.
Finalmente a aclaria cu e parti di gas comercial no ta regula pa gobierno. Eynan tin competencia liber y tin dos compania cu ta suminstra empresanan cu gas y e prijs eynan ta mas halto y no ta regula pa gobierno.
